सुदूरपश्चिम प्रदेश प्रहरी प्रमुख प्रहरी नायव महानिरीक्षक ओम बहादुर राना ले नगर बाल सञ्जालका प्रतिनिधिहरूसँग बालबालिका तथा युवाहरूका समस्या, चुनौती तथा सुधारका सम्भावित उपायबारे विस्तृत छलफल गर्नुभएको छ। उक्त कार्यक्रम सुदूरपश्चिम प्रदेश प्रहरी कार्यालयको आयोजनामा सम्पन्न भएको हो।
छलफलका क्रममा बाल सञ्जालका प्रतिनिधिहरूले वर्तमान समयमा बालबालिका तथा युवाहरूले भोगिरहेका विविध समस्याहरू प्रस्तुत गरेका थिए। उनीहरूले विद्यालय छोड्ने दर वृद्धि, लागुऔषध दुर्व्यसन, साइबर दुरुपयोग, बाल हिंसा तथा बाल श्रम जस्ता चुनौतीहरू बढ्दो रूपमा देखिएको उल्लेख गर्दै यस्ता समस्याको समाधानका लागि प्रहरी प्रशासनको सक्रिय भूमिका आवश्यक रहेको धारणा व्यक्त गरे।
यसै क्रममा प्रतिनिधिहरूले बालमैत्री वातावरण सिर्जना गर्न विद्यालयस्तरमै सचेतनामूलक कार्यक्रम सञ्चालन गर्नुपर्ने, समुदायस्तरमा बाल अधिकारसम्बन्धी अभियानलाई तीव्र बनाउनुपर्ने तथा बालबालिकाको सुरक्षाका लागि प्रभावकारी निगरानी संयन्त्र विकास गर्नुपर्ने सुझाव दिएका थिए।
प्रहरी नायव महानिरीक्षक रानाले बालबालिका तथा युवाहरू समाजको महत्वपूर्ण आधार भएको उल्लेख गर्दै उनीहरूको सुरक्षा र समुचित विकासका लागि प्रहरी संगठन सधैं प्रतिबद्ध रहेको बताउनुभयो। उहाँले बालमैत्री प्रहरी सेवा विस्तार, विद्यालय केन्द्रित सचेतनामूलक कार्यक्रम, तथा समुदाय–प्रहरी साझेदारीलाई थप सुदृढ बनाउने योजना रहेको जानकारी दिनुभयो।
उहाँले बालबालिकासँग सम्बन्धित घटनामा संवेदनशीलता अपनाउँदै छिटो तथा प्रभावकारी कारबाही गरिने प्रतिबद्धता जनाउँदै यस्ता छलफलले नीति निर्माण तथा कार्यान्वयनमा सकारात्मक योगदान पुर्याउने विश्वास व्यक्त गर्नुभयो।
कार्यक्रममा सहभागी अन्य सरोकारवालाहरूले पनि बालबालिका तथा युवाहरूको समस्या समाधानका लागि सबै पक्षबीच सहकार्य आवश्यक रहेको औंल्याएका थिए। उनीहरूले प्रहरी, स्थानीय तह, विद्यालय तथा अभिभावकबीच समन्वय सुदृढ गर्न सकेमा बालमैत्री समाज निर्माणमा महत्वपूर्ण उपलब्धि हासिल गर्न सकिने धारणा राखे।
कार्यक्रमको निष्कर्षमा बालबालिका तथा युवाहरूको हकहित संरक्षण, सुरक्षित वातावरण निर्माण तथा सचेतना अभिवृद्धिका लागि संयुक्त रूपमा अघि बढ्ने सहमति भएको थियो। साथै, यस्ता अन्तरक्रियात्मक कार्यक्रमलाई निरन्तरता दिने र प्राप्त सुझावहरूलाई कार्यान्वयनमा लैजाने प्रतिबद्धता समेत व्यक्त गरिएको थियो।
