धनगढी- कैलालीको मसुरियास्थित नवज्योति कृषक बहुउद्देश्यीय सहकारी संस्था लिमिटेडमार्फत सञ्चालन गरिएको बाख्रा अनुदान कार्यक्रममा मूल्य निर्धारण सम्बन्धी विषयलाई लिएर प्रश्न उठेको छ। भेटेरिनरी अस्पताल तथा पशु सेवा विज्ञ केन्द्र, धनगढीको आर्थिक सहयोग तथा २५ प्रतिशत कृषक साझेदारीमा केही दिनअघि गौरीगंगा नगरपालिका–७, ८, ९ र १० का २६ जना कृषकलाई बाख्रा वितरण गरिएको थियो।
स्थानीय स्रोतका अनुसार सहकारीले बाख्रा खरिद गर्दा प्रतिकिलो रु. ४५० का दरले खरिद गरेको भए पनि कृषकहरूबाट प्रतिकिलो रु. ६०० का दरले रकम असुलेको आरोप लागेको छ। यसका साथै जिल्लाको निर्धारित दररेटको नाममा स्थानीय जातका बाख्रा खरिद गरी खरिद मूल्य र वितरण मूल्यबीचको अन्तर रकममा अनियमितता भएको आशंका समेत व्यक्त गरिएको छ।
स्थानीय कृषकहरूले बजारमा जिउँदो बाख्राको मूल्य प्रतिकिलो करिब रु. ३५० रहेको अवस्थामा खरिद तथा वितरण मूल्यबीच ठूलो अन्तर देखिएको बताएका छन्। उनीहरूले उक्त विषयमा सम्बन्धित निकायबाट निष्पक्ष छानबिन गरी वास्तविकता सार्वजनिक गर्न माग गरेका छन्।
यद्यपि, यस विषयमा सहकारी संस्था तथा सम्बन्धित निकायको आधिकारिक प्रतिक्रिया प्राप्त हुन बाँकी रहेको छ। आरोपबारे सत्यतथ्य पत्ता लगाउन सम्बन्धित पक्षबाट छानबिन आवश्यक रहेको स्थानीयहरूको भनाइ छ।
Advertisement
