धनगढी– धनगढी–पहाड रुटमा सञ्चालन हुँदै आएका ईभी हाइस तथा अन्य सवारी साधनका व्यवसायीहरूले आफूहरूलाई लागू गरिएको समयसीमा, नीति–नियम तथा परमिट व्यवस्थाप्रति असन्तुष्टि जनाउँदै बुधबार धनगढीस्थित मुख्यमन्त्री तथा मन्त्रिपरिषद्को कार्यालय अगाडि विरोध प्रदर्शन गरेका छन्।
व्यवसायीहरूका अनुसार राति ८ बजेपछि गन्तव्यबाट सवारी साधन छुट्न नदिने व्यवस्थाले यात्रु सेवा तथा व्यवसाय दुवै प्रभावित भएको छ। सो व्यवस्थाको विरोधमा करिब ८० भन्दा बढी सवारी साधनसहित उनीहरूले प्रदर्शन गरेका हुन्।
व्यवसायीहरूले ईभी हाइसमाथि मात्र कडाइ गरिएको तर मिनीबस, मिनी ट्रक, स्कार्पियो लगायत अन्य सवारी साधन भने नियमित रूपमा सञ्चालन भइरहेको गुनासो गरेका छन्। ईभी सवारीलाई पनि समान व्यवहार गर्दै सहज रूपमा सञ्चालन गर्न पाउने वातावरण बनाउनुपर्ने मागसहित उनीहरूले मुख्यमन्त्री कार्यालयमा ज्ञापनपत्रसमेत बुझाएका छन्।
विरोध प्रदर्शनपछि कमलबहादुर शाह ले व्यवसायीका प्रतिनिधिसँग औपचारिक छलफल गर्ने प्रतिबद्धता जनाएका छन्। मुख्यमन्त्री शाहले व्यवसायीहरूले उठाएका समस्या, माग र सुझावबारे विस्तृत छलफल गरी आवश्यक समाधान खोजिने बताउँदै सम्बन्धित पक्षलाई वार्ताका लागि बोलाइएको जानकारी दिएका छन्।
व्यवसायी र प्रदेश सरकारबीच हुने छलफलबाट देखिएका समस्या समाधान हुने अपेक्षा गरिएको छ।
Advertisement
