बझाङ- बझाङको बित्थडचिर गाउँपालिका–६, दल्ली निवासी समाजसेवी तथा घटाल पोल्ट्री फर्मका सञ्चालक रमेश बहादुर ओडले आफ्नो जन्मदिनको अवसरमा विद्यार्थीहरूलाई शैक्षिक सामग्री वितरण गरेका छन्।
ओडले जनचेतना प्राथमिक विद्यालय, मल्चिरमा अध्ययनरत विद्यार्थीहरूलाई विद्यालय झोला वितरण गरेका हुन् ।
उनलेे जन्मदिनलाई केवल व्यक्तिगत उत्सवका रूपमा सीमित नराखी सामाजिक उत्तरदायित्वसँग जोड्ने प्रयास गरेको बताए। शिक्षाको प्रवर्द्धन र बालबालिकाको अध्ययनप्रति उत्साह अभिवृद्धि गर्न उक्त सहयोग प्रदान गरेको उनको भनाइ छ।
झोला वितरण कार्यक्रममा विद्यालय व्यवस्थापन समिति अध्यक्ष राई भान ओखेडा, बित्थडचिर गाउँपालिका–६ का वडाध्यक्ष हरिश खड्का, विद्यालयका शिक्षक तथा कर्मचारी, बित्थडचिर गाउँपालिका–९ निवासी प्रकाश विकलगायत स्थानीय अभिभावक, बुद्धिजीवी तथा समाजसेवीहरूको उल्लेखनीय उपस्थिति रहेको थियो।
कार्यक्रममा सहभागी व्यक्तित्वहरूले रमेश ओडको सामाजिक कार्यको उच्च प्रशंसा गर्दै यस्ता सहयोगमूलक गतिविधिले विद्यार्थीहरूको शैक्षिक विकासमा सकारात्मक प्रभाव पार्ने विश्वास व्यक्त गरे। उनीहरूले समाजका अन्य व्यक्तिहरूलाई पनि यस्ता रचनात्मक तथा प्रेरणादायी कार्यमा सहभागी हुन आग्रह गरेका छन्।
झोला वितरणपछि विद्यार्थीहरूमा देखिएको उत्साह र खुसीले कार्यक्रमलाई थप विशेष बनाएको थियो।
Advertisement
