बझाङ । आफ्नो जन्मदिनलाई समाजसेवामार्फत अर्थपूर्ण बनाउन सुदूरपश्चिमाञ्चल विद्या सदन, चैनपुर बझाङकी प्रिन्सिपल सरस्वती खत्रीले सत्यवादी माध्यमिक विद्यालय, भोपुरस्थित अनाथ बालबालिका आवासगृह पुगेकी छन् । जन्मोत्सवको अवसर पार्दै उहाँले आवासगृहमा बसोबास गर्दै आएका २० जना बालकहरूलाई न्यानो कपडा, खाद्यान्न तथा दैनिक जीवनमा आवश्यक सामग्रीहरू वितरण गर्नुभएको हो ।
प्रिन्सिपल खत्रीले सामग्री वितरणपछि बालबालिकासँग समय बिताउँदै उनीहरूको शैक्षिक अवस्था, दैनिकी र आवश्यकताबारे पनि जानकारी लिइन् । बालबालिकासँग प्रत्यक्ष भेटघाट र संवादले उनीहरूमा उत्साह र आत्मविश्वास बढेको आवासगृहका प्रतिनिधिहरूले बताएका छन् ।
स्थानीय अभिभावक, विद्यालयका शिक्षक तथा सरोकारवालाहरूले प्रिन्सिपल खत्रीको मानवीय कदमको प्रशंसा गर्दै जन्मदिन जस्ता व्यक्तिगत अवसरलाई समाज उपयोगी कार्यमा रुपान्तरण गर्नु प्रेरणादायी रहेको टिप्पणी गरेका छन् ।
सोही क्रममा प्रिन्सिपल सरस्वती खत्रीले भनिन् जन्मदिन केवल व्यक्तिगत खुसीको दिन मात्र होइन समाजका लागि केही गर्ने अवसर पनि हो । अनाथ बालबालिकासँग समय बिताएर खुसी बाँड्न पाउँदा आफू अत्यन्त खुशी भएकी छु । भविष्यमा पनि यस्ता सामाजिक गतिविधिलाई निरन्तरता दिने प्रतिबद्धता व्यक्त गर्नु भएको छ ।
उहाँको समाजसेवी भावनाले बालबालिकाको दैनिकीमा सकारात्मक ऊर्जा थपेको बताउँदै आवासगृहका सञ्चालकहरूले पनि धन्यवाद व्यक्त गरेका छन् ।
सम्पूर्ण अनाथ बालबालिकाको तर्फबाट प्रिन्सिपल खत्रीलाई जन्मदिनको हार्दिक शुभकामना दिँदै सुस्वास्थ्य, दीर्घायु र आगामी दिनमा अझ उचाइ हासिल गर्न शुभकामना व्यक्त गरिएको छ ।
