बझाङ, — बझाङको वित्थडचिर गाउँपालिकाकी उपाध्यक्ष धनलक्ष्मी मल्लको नेतृत्वमा वडा नम्बर ५ र ९ का कृषकहरुलाई लक्षित गर्दै ठूलो परिमाणमा वर्षेनी फलफूलका बिरुवा वितरण गरिएको छ । हिजो शनिबार सम्पन्न कार्यक्रममा तल्लाभताँडा, धामीगाउँ र वसैल टोलका कृषकहरुलाई विभिन्न जातका फलफूलका बिरुवा हस्तान्तरण गरिएको हो ।
गाउँपालिकाको कृषि विकास कार्यक्रम अन्तर्गत सञ्चालन गरिएको यस कार्यक्रममा उपाध्यक्ष मल्लसँगै वडा अध्यक्ष, सदस्य, कृषि शाखाका प्राविधिक र स्थानीय जनप्रतिनिधिहरु सक्रिय रूपमा सहभागी थिए । वितरण कार्यक्रममा कृषकहरुलाई अनार, अम्बा लगायतका वर्षेनी फलफूलका बिरुवा उपलब्ध गराइएको थियो । उपाध्यक्ष मल्लले कार्यक्रममा भनिन्, हाम्रो गाउँपालिकामा उत्पादनशील र दीर्घकालीन लाभ दिने योजनाहरुलाई प्राथमिकतामा राखेका छौं । वर्षेनी फलफूलका बिरुवा वितरण गर्नुको उद्देश्य कृषकहरूको आय आर्जन बढाउनु, पर्यावरण संरक्षण गर्नु र बजारमा स्थानीय उत्पादनको आपूर्ति वृद्धि गर्नु हो । हामी कृषकहरूलाई आवश्यक प्राविधिक तालिम, मल–बिउको व्यवस्था तथा रोग–कीरा नियन्त्रणका उपायहरू पनि उपलब्ध गराउने प्रतिबद्धता व्यक्त गर्छौं ।
वडा नं. ५ र ९ का कृषकहरूले यो पहललाई उत्साहका साथ स्वागत गरेका छन् । स्थानीयवासीहरूले जनप्रतिनिधिहरूको सक्रियता र समर्पणको प्रशंसा गर्दै जनताका आवाज र आवश्यकता अनुसार काम भइराखेकोमा खुशी व्यक्त गरेका छन् । गाउँपालिकाकी उपाध्यक्ष मल्लले आगामी दिनमा पनि यस्तै विकासीय कार्यक्रमहरू सञ्चालन गरिने र कृषकहरूको समृद्धिका लागि निरन्तर पहल गरिने जानकारी दिएका छन् ।
