कैलाली, बैशाख ११। कैलालीको घोडाघोडी नगरपालिका–२ टनकपुरमा पूर्व–पश्चिम राजमार्गमा बस र ट्र्याक्टर ठोक्किँदा १३ जना यात्रु घाइते भएका छन्। आज बिहान करिब ६:२५ बजे पूर्वबाट पश्चिमतर्फ गइरहेको बसले ट्र्याक्टरलाई ओभरटेक गर्ने क्रममा दुर्घटना भएको इलाका प्रहरी कार्यालय सुखडले जनाएको छ।
दुर्घटनामा सुदूरपश्चिम यातायातको काठमाडौंबाट बझाङ जाँदै गरेको (ना.प्र. ०१००१ ख ३३८५) नम्बरको बस र सोही दिशातर्फ गइरहेको (ना.प्र. ०१००२ त ४६४०) नम्बरको ट्र्याक्टर एकआपसमा ठोक्किएका थिए। बस बझाङको बित्थडचिर गाउँपालिका–४ का २४ वर्षीय विनोद बोहराले चलाएका थिए भने ट्र्याक्टर कैलालीको बर्दगोरिया गाउँपालिका–४ का ४५ वर्षीय भासु डगौरा थारुले चलाएका थिए।
दुर्घटनामा बसमा सवार ३६ यात्रुहरूमध्ये ८ महिला, ४ पुरुष र १ बालकसहित १३ जना घाइते भएका छन्। घाइतेहरूलाई तत्काल घोडाघोडी अस्पताल र सि.यस अस्पताल, सुखडमा उपचारका लागि लगिएको छ।
घटनास्थलमा इलाका प्रहरी कार्यालयका प्रमुख डिएसपी दिर्घबहादुर साउदको नेतृत्वमा १५ जना प्रहरी खटिएको थियो। प्रहरीले दिएको जानकारी अनुसार बस सडकबाट २५ फिट उत्तरपट्टि पल्टिएको थियो भने ट्र्याक्टर सडकको बीचबाट उत्तरतर्फ पूर्ण रूपमा ढल्किएको अवस्थामा फेला परेको हो।
बसको छतमा राखिएको मो.सा. (ना.प्र. ०१०१० प ५१६७) समेत खसेर क्षति पुगेको छ। दुर्घटनाका कारण सडकमा कुनै अवरोध भने नरहेको प्रहरीले जनाएको छ। बस चालक नियन्त्रणमा रहेका छन् र उनीसंग सवारी अनुमति र मापसे परीक्षणमा समस्या देखिएको छैन।
घाइतेहरूको विवरण यसप्रकार छ:
घोडाघोडी अस्पतालमा उपचाररत:
- भासु डगौरा थारु (४५), टाउको र खुट्टामा चोट – मध्यम
- बबिता सुनार (५५), खुट्टा र घाटिमा सामान्य चोट
- प्रेमकुमार सुनार (६४), छातीमा चोट – मध्यम
- रोहित गिरी (३०), गर्दन र हातमा सामान्य चोट
- जयन्ती जोशी (२०), दाहिने हातमा चोट – सामान्य
- सरिता कुमारी कोइराला (२८), कम्मरमा चोट – सामान्य
- लोकराज खत्री (३३), टाउको कम्मरमा चोट – मध्यम
- ज्ञानु गिरी (५५), ढाडमा चोट – सामान्य
- टिका कुवर (३५), कम्मरमा चोट – सामान्य
- हसुली धामी (२६), टाउको र कम्मरमा चोट – मध्यम
- कलावती देवी अवस्थी (४९), छातीमा चोट – मध्यम
सि.यस अस्पतालमा उपचाररत:
12. बर्षा श्रेष्ठ (२४), टाउकोमा चोट – मध्यम
13. सुसान्त श्रेष्ठ (१०), दाहिने खुट्टा भाँचिएको – मध्यम
प्रहरीले थप अनुसन्धान गरिरहेको जनाएको छ।
