धनगढी, कैलाली — धनगढी उपमहानगरपालिका–२ सन्तोषी टोलमा लागुऔषध कारोबार भइरहेको भन्ने गोप्य सूचनाका आधारमा खटिएको प्रहरी टोलीले एकजनालाई लागुऔषधसहित पक्राउ गरेको छ।
वडा प्रहरी कार्यालय धनगढीका प्रहरी निरीक्षक योगेश खत्रीको नेतृत्वमा खटिएको संयुक्त टोलीले कञ्चनपुर जिल्ला, कृष्णपुर नगरपालिका–२ का ४० वर्षीय मिन बहादुर बमलाई नियन्त्रणमा लिएको हो। शंका लागि चेकजाँच गर्दा बमको डेराबाट ८ ग्राम ४६० मिलिग्राम ब्राउनसुगर जस्तो देखिने खैरो पदार्थ फेला पारिएको प्रहरीले जनाएको छ।
लागुऔषध नियन्त्रण ब्युरोको सहकार्यमा गरिएको उक्त अपरेसन सफल भएको बताउँदै प्रहरी निरीक्षक खत्रीले भने, “हामी निरन्तर निगरानीमा छौं। स्थानीय समुदायको सहयोगले यस्ता घटनामा संलग्न व्यक्तिहरू पक्राउ गर्न सहज भएको छ।”
उनले थपे, “लागुऔषध अलिकति मात्र समातिएको भन्दै जनमानसमा भएको गलत बुझाइ हटाउन जरुरी छ। यदि थोरै मात्राले पनि ५० देखि १०० जनासम्मको सेवन रोक्न सकिन्छ भने, त्यो समाजमा हुने ठूला घटनाहरू घटाउने उपाय हो।”
स्थानीयवासीहरूका अनुसार, निरीक्षक खत्रीले वडा इञ्चार्जको जिम्मेवारी सम्हालेयता यस्ता अवैध गतिविधिमा संलग्न व्यक्तिहरूलाई बारम्बार पक्राउ गरिएकाले पछिल्लो समय लागुऔषधसम्बन्धी घटनाहरूमा गिरावट आएको छ।
प्रहरी स्रोतका अनुसार, सुदूरपश्चिम प्रदेशमा लागुऔषध कारोबार नियन्त्रण गर्न लागुऔषध नियन्त्रण ब्युरो र वडा प्रहरी कार्यालयबीच समन्वय गर्दै कडा निगरानी र कारबाही अभियान तीव्र बनाइएको छ।
हाल पक्राउ परेका मिन बहादुर बममाथि लागुऔषध सम्बन्धी मुद्दामा थप अनुसन्धान भइरहेको प्रहरीले जनाएको छ।
