बझाङ- बझाङको जयपृथ्वी नगरपालिका–११ का वडासदस्य पदमराज जोशीले बालमैत्री स्थानीय शासन वडा घोषणाका लागि आवश्यक पर्ने सुचकहरू पूरा गर्नमा वडासरकारले विशेष ध्यान दिएको बताएका छन् ।
उनले शुक्रबार प्रगतिशिल युवा समाज र वल्डभिजनको साझेदारीमा संचालित बाल संरक्षण परियोजना अन्तर्गत आयोजित बालबालिकालाई आधारभुत आत्मरक्षा तालिमको कार्यक्रममा बोल्दै यस्तो बताएका हुन् ।
उनलेे भने, ‘हामी बालमैत्री वडा घोषणाका लागि आवश्यक सबै सुचकहरूमा काम गर्दैछौं र बजेट विशेष रूपमा बालबालिका र बालमैत्री वडा घोषणामा केन्द्रित गरिएको छ । यसै वर्ष एक घर एक धारा जोड्ने लक्ष्य राखेका छौं ।’
जोशीका अनुसार, बालमैत्री वडा घोषणाका लागि आवश्यक पर्ने ५१ वटा सुचक मध्ये धेरैजसो पूरा भइसकेका छन् भने केही सुचक पूरा गर्न बाँकी छन् । वडामा बाल अधिकार समितिले कार्ययोजना बनाई सुचकहरू पूरा गर्नका लागि सक्रिय रूपमा काम गरिरहेको उनको भनाई छ ।
अहिले बालमैत्री वडा घोषणाका लागि जोखिममा रहेका बालबालिकाको तथ्याङ्क अभिलेख र आरसी बालबालिकाको पनि अनुगमन भइरहेको जोशीले बताए । जयपृथ्वी नगरपालिका, बझाङले वडा नम्बर ६ र ११ लाई बालमैत्री स्थानीय शासन वडा घोषणाका लागि प्राथमिकतामा राखेको छ ।
