बझाङ- बझाङको झोतामा रहेको बझाङदीप क्याम्पसको स्वतन्त्र विद्यार्थी युनियन (स्ववियु) निर्वाचनमा नेविसंघ र अनेरास्ववियुका साझा उम्मेदवार रुपमा रोशन भण्डारीको प्यानलले उम्मेदवारी दर्ता गराएका छन् । आगामी चैत ५ गते हुने स्वतन्त्र विद्यार्थी युनियन (स्ववियु) निर्वाचनमा नेविसंघ र अनेरास्ववियु बिच गठबन्धनभएपछि नेविसंघका विद्यार्थी नेता रोशन भण्डारीले सभापति पदमा उम्मेदवारी दर्ता गराएका हुन्। । भण्डारीले आफ्नो उम्मेदवारीसँगै शैक्षिक गुणस्तर सुधार, विद्यार्थीको हकहित संरक्षण, भौतिक पूर्वाधार विकास र रोजगारमूलक कार्यक्रमलाई आफ्नो प्रमुख एजेन्डा बनाएका हुन् ।
उनले क्याम्पसमा गुणस्तरीय शिक्षा प्रवर्द्धन गर्न योग्य प्राध्यापकको व्यवस्था, पुस्तकालय तथा प्रयोगशालाको विस्तार र डिजिटल शिक्षाको प्रवर्द्धन गर्ने प्रतिबद्धता जनाएका छन् । साथै, विद्यार्थीको हकहित संरक्षण गर्दै छात्रवृत्ति वितरणलाई पारदर्शी बनाउने, पढ्दै कमाउँदै कार्यक्रम गर्नी, आर्थिक रूपमा कमजोर तथा जेहेन्दार विद्यार्थीलाई विशेष सहायता उपलब्ध गराउने र शुल्क वृद्धिमा अनावश्यक भार नपरोस् भन्नेमा ध्यान दिने बताएका छन् ।
भण्डारीले भौतिक पूर्वाधार विकास अन्तर्गत क्याम्पसमा स्वच्छ खानेपानी, उचित शौचालय सुविधा, अतिरिक्त कक्षा कोठा, तथा अध्ययनमैत्री वातावरण निर्माण गर्ने योजना अघि सारेका छन् । साथै, स्नातक तहका विद्यार्थीलाई रोजगारी र सीपमूलक तालिम प्रदान गर्दै इन्टर्नशिप तथा रोजगारसम्बन्धी कार्यक्रम सञ्चालन गरेर उनीहरूको भविष्य सुनिश्चित गर्न पहल गर्ने प्रतिबद्धता व्यक्त गरेका छन् ।
विद्यार्थीहरूको शैक्षिक तथा व्यावसायिक विकासका लागि आफू सधैं अग्रसर रहने बताउँदै भण्डारीले आगामी निर्वाचनमा आफ्नो उम्मेदवारीलाई समर्थन गर्न सबैलाई आग्रह गरेका छन् ।
यस्तै क्याम्पसको स्ववियु सभापतिका लागि अखिल समाजवादकाबाट अक्कल धामीले र अनेरास्ववियू र अखिल क्रान्तिकारीको साझा उम्मेदवारका रुपमा सुरेश राज जैशीले उम्मेदवारी दर्ता गराएका छन् ।
