धनगढी – पुरानो गठबन्धन भत्केर केन्द्रमा नयाँ सत्ता गठबन्धन बनेपछि सुदूरपश्चिम प्रदेशमा उथलपुथल भएको छ ।
माओवादीले नयाँ गठबन्धन बनाएपछि सरकार फेरबदल हुने सम्भावना बढेको छ । केन्द्रमा नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी, जनता समाजवादी पार्टीको नयाँ गठबन्धन बनेको छ ।
नयाँ गठबन्धनका कारण मुख्यमन्त्री कमलबहादुर शाह अप्ठ्यारोमा परेका छन् । तत्कालीन मुख्यमन्त्री नेकपा (एमाले) का राजेन्द्रसिंह रावलले बहुमत जुटाउन नसकेपछि प्रदेशमा ठुलो दलको नेताका हैसियतले नेपाली कांग्रेसका शाह मुख्यमन्त्री भएका थिए । उनको नेतृत्वको सरकारमा माओवादी, नागरिक उन्मुक्ति पार्टी र नेकपा (एकीकृत समाजवादी) समावेश छन् । शाहले गतवर्ष माघ २६ गते मन्त्रीमण्डल गठन गरेका थिए ।
केन्द्रमा नयाँ गठबन्धन बनिसकेकाले प्रदेशमा पनि त्यो गठबन्धन लागू हुने नेकपा (माओवादी केन्द्र) को दलका नेता मानबहादुर धामीले बताए ।
यद्यपि, प्रदेश सरकार फेरबदलबारे तत्काल छलफल नचले पनि केन्द्रको निर्णय कुरिरहेको उनको भनाइ छ ।
“केन्द्रमा गठबन्धनको कार्यदल बनेको छ । कार्यदलले जे निर्णय गर्छ, प्रदेशमा त्यसलाई लागु गर्न हामी प्रतिबद्ध छौँ”, उनले भने ।
नेकपा (एमाले) पनि कार्यदलकै निर्णय कुरिरहेको छ । केन्द्रमा नयाँ गठबन्धन बनिसकेकाले सुदूरपश्चिम सरकार फेरबदल हुने र नयाँ सरकार गठबन्धन दलकै निर्णय अनुसार बन्ने नेकपा (एमाले) का प्रदेश सभा सदस्य धर्मराज पाठकले बताए ।
सुदूरपश्चिम प्रदेशमा नयाँ गठबन्धन अनुसार सरकार गठन भएमा नागरिक उन्मुक्ति पार्टी निर्णायक देखिन्छ । ५३ सदस्यीय प्रदेश सभामा बहुमतको सरकार गठनका लागि २७ जना प्रदेश सभा सदस्यको साथ आवश्यक पर्ने गर्दछ ।
प्रदेश सभामा नेकपा (एमाले) र माओवादी केन्द्रबाट १०÷१० जना र नागरिक उन्मुक्ति पार्टीबाट सात जना प्रदेश सभा सदस्यको प्रतिनिधित्व छ । तीनै दलको सदस्य सङ्ख्या मिलाएर सरकार गठनका लागि बहुमत पुग्ने छ।
यद्यपि, नयाँ सत्ता गठबन्धनमा रहने वा नरहने विषयमा नागरिक उन्मुक्ति पार्टीले आधिकारिक निर्णय गरिसकेको छैन । माओवादी दलका नेता धामीले सुदूरपश्चिममा निर्णायक नागरिक उन्मुक्ति पार्टी नयाँ गठबन्धनमा आउने विश्वास व्यक्त गरे ।
नयाँ सत्ता गठबन्धन बनेसँगै प्रदेशमा मुख्यमन्त्री को बन्ने भन्ने चर्चा र चासो बढेको छ । माओवादी र एमाले दुवै पार्टीले मुख्यमन्त्रीमा स्वाभाविक रूपमै आ–आफ्नो पार्टीको दाबी रहने बताएका छन् ।
त्यस्तै, नागरिक उन्मुक्ति पार्टीका अध्यक्ष रेशम चौधरीले सञ्चार माध्यममा प्रतिक्रिया दिदैँ सुदूरपश्चिममा आफ्नो पार्टी निर्णायक रहेकाले गठबन्धनमा नागरिक उन्मुक्ति पार्टीको महत्त्व रहने बताएका छन् । -गोरखापत्रबाट
