धनगढी- शहीद दशरथचन्द स्वास्थ्य विज्ञान विश्वविद्यालयसभाको बैठक आज बस्दै छ। पहिलोपटक कैलालीको गेटामा बैठक आयोजना गर्न लागिएको हो। यसअघि भएका तीनवटा विश्वविद्यालयसभा (सिनेट) बैठक संघीय राजधानीमा सम्पन्न भएका थिए।
बैठकका लागि सभा अध्यक्षसमेत रहेका शिक्षामन्त्री सस्मित पोखरेल मंगलबार नै कैलाली पुगिसकेका छन्। विश्वविद्यालयको सर्वोच्च निकायका रूपमा रहने विश्वविद्यालयसभा गठन गरिएको छ, जसको अध्यक्ष विश्वविद्यालयका सह–कुलपतिसमेत रहेका शिक्षामन्त्री हुने व्यवस्था छ।
यसैगरी, सह- कुलपतिका रूपमा रहेका स्वास्थ्यमन्त्री, सुदूरपश्चिम प्रदेशका मुख्यमन्त्री, विश्वविद्यालय अनुदान आयोगका अध्यक्ष, चिकित्सा शिक्षा आयोगका उपाध्यक्ष, उपकुलपति तथा गोदावरी नगरपालिकाका प्रमुखलगायत सदस्य रहने कानुनी व्यवस्था छ। विश्वविद्यालयको कुलपति भने प्रधानमन्त्री रहने प्रावधान छ।
विश्वविद्यालयमा चिकित्सा शिक्षा अध्यापन सुरु गर्ने तयारी भइरहेको छ। आगामी शैक्षिक सत्रदेखि एमबीबीएस, नर्सिङ, बीएस्सी एमएलटी र बी अप्टोमेट्री कार्यक्रम सञ्चालन गर्ने लक्ष्य राखिएको छ।
शिक्षा, विज्ञान तथा प्रविधि मन्त्रालयले विश्वविद्यालयका लागि ७५ प्रतिशत छात्रवृत्तिको वित्तीय स्रोत सुनिश्चित गरिसकेको छ। आर्थिक वर्ष २०८२/८३ को जेठ र असार महिनाका लागि चिकित्सकहरूको तलबबापत पाँच करोड रुपैयाँ बजेट प्राप्त भइसकेको छ। साथै, आगामी वर्षका लागि आवश्यक २ अर्ब ५३ करोड रुपैयाँ बजेट सुनिश्चितताका लागि अर्थ मन्त्रालयमा प्रस्ताव पेस गरिएको छ।
Advertisement
