आज संघीय संसद्को दुवै सदनको बैठक बस्दै, सभामुखमा डोलप्रसाद अर्याललाई औपचारिक स्वीकृति दिइने

काठमाडौं- संघीय संसद्को दुवै सदन-प्रतिनिधिसभा र राष्ट्रियसभा—को बैठक आज बस्दैछ। सिंहदरबारस्थित निर्माणाधीन संघीय संसद् भवनको बहुउद्देश्यीय हलमा बिहान ११ बजे प्रतिनिधिसभाको बैठक बस्नेछ भने अपराह्न १२:१५ बजे राष्ट्रियसभाको बैठक तय गरिएको छ।
आजको प्रतिनिधिसभा बैठकमा राष्ट्रिय स्वतन्त्र पार्टी (रास्वपा) का उपसभापति डोलप्रसाद अर्याललाई सभामुख पदमा निर्वाचित गरियोस् भन्ने प्रस्ताव निर्णयार्थ प्रस्तुत गरिनेछ। अर्याल यसअघि नै निर्विरोध रूपमा सभामुख चयन भइसकेका छन्। उनको प्रस्तावकमा रास्वपा सभापति रवि लामिछाने रहेका छन् भने समर्थकमा स्वर्णिम वाग्ले, सोविता गौतम र सुनिल लम्साल रहेका छन्।
त्यस्तै, राष्ट्रियसभाको बैठकमा विषयगत समितिका सदस्यहरूको मनोनयन तथा हेरफेर गर्ने कार्यसूची रहेको छ। साथै, अध्यक्ष र उपाध्यक्षको अनुपस्थितिमा बैठक सञ्चालन गर्ने सदस्यहरूको नाम पनि तोकिनेछ।
यसैगरी, प्रधानमन्त्री बालेन्द्र शाहले महिला आयोगको आर्थिक वर्ष २०८१/८२ को वार्षिक प्रतिवेदन पनि बैठकमा पेस गर्ने कार्यक्रम रहेको संसद् सचिवालयले जनाएको छ।