कैलाली — जिल्ला प्रहरी कार्यालय कैलाली अन्तर्गत धनगढी क्षेत्रमा कार्यरत प्रहरी निरीक्षक सुरज रोकायाको सक्रियताले पछिल्लो समय अपराध नियन्त्रण र शान्ति सुरक्षामा उल्लेखनीय सुधार देखिएको छ। धनगढीमा खटिएसँगै उनले आपराधिक गतिविधि नियन्त्रणलाई प्राथमिकतामा राख्दै प्रभावकारी रूपमा कानुन कार्यान्वयन अघि बढाएका छन्।
प्रहरी निरीक्षक रोकायाले मोबाइल टोली परिचालन गरी दैनिक रूपमा संवेदनशील क्षेत्रहरूमा अनुगमन गर्दै आएका छन्। साथै, मातहतका प्रहरी इकाइहरूलाई नियमित निर्देशन दिँदै उनीहरूलाई अझै जिम्मेवार र सतर्क बनाउने काममा पनि सक्रिय देखिएका छन्। विशेषगरी गुण्डागिर्दी, लागूऔषध कारोबार, तथा अन्य अवैध क्रियाकलापहरू नियन्त्रण गर्न उनले कडाइका साथ कारबाही प्रक्रिया अगाडि बढाएका छन्।
उनको नेतृत्वमा सञ्चालन भएका अपरेशनहरूले विभिन्न आपराधिक समूहहरूमा मनोवैज्ञानिक दबाब सिर्जना गरेको छ भने अपराध दरमा समेत कमी आएको प्रहरी स्रोतले जनाएको छ। स्थानीयवासीहरूका अनुसार, रोकाया पछिल्लो समय अत्यन्तै इमानदार, सक्रिय र जनमुखी प्रहरी अधिकारीका रूपमा परिचित बन्दै गएका छन्।
स्थानीय व्यापारी तथा सर्वसाधारणले समेत धनगढीको बजार क्षेत्र अहिले पहिलेको तुलनामा सुरक्षित महसुस गर्न थालेको बताएका छन्। रोकायाको सक्रियताले रात्रीकालीन सुरक्षा व्यवस्थापनमा सुधार ल्याएको र सार्वजनिक स्थलहरूमा निगरानी बढेको उनीहरूको भनाइ छ।
यसैबीच, प्रहरी निरीक्षक रोकायाले नागरिकसँग सहकार्य गर्दै अपराधमुक्त समाज निर्माण गर्न सबैको साथ र सहयोग आवश्यक रहेको बताएका छन्। उनले कानुनविपरीत गतिविधिमा संलग्न जोसुकैलाई पनि कानुनी दायरामा ल्याइने चेतावनी दिएका छन्।
धनगढीमा शान्ति सुरक्षा मजबुत बनाउन प्रहरी निरीक्षक रोकायाको सक्रिय भूमिका आगामी दिनमा अझ प्रभावकारी हुने अपेक्षा गरिएको छ।
