अछाम- दिपक साउँदले अछामवासी जनता भूगोलले नभई गलत नेतृत्वका कारण पछि परेको बताएका छन्। अछाम क्षेत्र नं-१ प्रतिनिधि सभा सदस्यका उम्मेदवार साउँदले जिल्लाको साफेबगर नगरपालिका- १२ बल्यालत मा आयोजित चुनावी सभालाई सम्बोधन गर्दै यस्तो धारणा व्यक्त गरेका हुन्।
सभामा बोल्दै उनले बारम्बार निर्वाचित भएर सत्तामा पुगेका नेताहरू जनताप्रति उत्तरदायी बन्न नसकेको आरोप लगाएका छन् ।
“हामी भूगोलबाट होइन, नेता तथा जनप्रतिनिधिबाट ठगिएका हौं,” उनले भने, “हाम्रो भूगोल अथाह सम्भावनाले भरिएको छ, आत्मनिर्भर बन्न सक्ने आधार छ, तर सही प्रतिनिधित्व नहुँदा नागरिक अपेक्षाअनुसार विकास हुन सकेन।
साउँदले अछाम भौगोलिक रूपमा धनी जिल्ला भएको उल्लेख गर्दै कृषि र पर्यटन क्षेत्रमार्फत आर्थिक समृद्धि हासिल गर्न सकिने बताए। उनले ग्रामीण चौखुट्टे-रामारोशन सडक स्तरोन्नति गर्ने, खप्तड जाने सडक निर्माण गरी छोटो दूरीमा आवागमनको व्यवस्था गर्ने प्रतिबद्धता व्यक्त गरेका थिए । सेती लोकमार्गले खोलेका सडकलाई बाह्रै महिना सञ्चालनयोग्य बनाउने योजना पनि उनले अघि सारिने बताए ।
नगरपालिकाको सबैभन्दा उच्च स्थानमा रहेको वडा नं- १२ खप्तड क्षेत्रसँग जोडिएको उल्लेख गर्दै उनले उक्त क्षेत्रलाई पर्यटकीय केन्द्रका रूपमा विकास गर्ने बताए।
पर्यटन प्रवर्द्धनमार्फत स्थानीय युवालाई रोजगारीसँग जोड्ने, बढ्दो बसाइँसराइ रोक्ने तथा गाउँमै आयआर्जनका अवसर सिर्जना गर्ने आफ्नो प्राथमिकता रहेको उनले स्पष्ट पारे।
साथै, गुणस्तरीय स्वास्थ्य सेवा र शिक्षाको पहुँच विस्तार गर्दै नागरिकको आधारभूत आवश्यकता पूरा गर्ने प्रतिबद्धता व्यक्त गर्दै साउँदले आफूलाई एक पटक अवसर दिन मतदातासँग आग्रह गरे।
सभामा स्थानीय बासिन्दाले सडक, रोजगारी र सेवा-सुविधाको अभावका विषयमा गुनासा राखेका थिए। उम्मेदवार साउँदले ती समस्यालाई प्राथमिकतामा राखेर काम गर्ने प्रतिवद्धता जनाएका छन्।
