देउवा विशेष महाधिवेशनमा सहभागी हुने भन्ने सूचना असत्य : सचिवालय

नेपाली कांग्रेसका सभापति एवं पूर्वप्रधानमन्त्री शेरबहादुर देउवा आज काठमाडौँको भृकुटीमण्डपमा जारी विशेष महाधिवेशनमा सहभागी हुने भन्ने सूचना भ्रामक भएको भन्दै उनको सचिवालयले खण्डन गरेको छ।
सभापति देउवाका स्वकीय सचिव भानु देउवाले आज बिहान जारी गरेको विज्ञप्तिमा सभापति विशेष महाधिवेशनमा जाने कुनै पनि कार्यक्रम नरहेको स्पष्ट गरेका छन्।
विज्ञप्तिमा भनिएको छ, “सामाजिक सञ्जालमार्फत केही व्यक्तिहरूले भ्रम फैलाउने उद्देश्यले सभापति शेरबहादुर देउवा आज भृकुटीमण्डप जाने भन्ने गलत सूचना प्रवाह गरेका छन्। उक्त कार्यक्रममा पार्टी सभापति सहभागी हुने कुनै कार्यक्रम नरहेको स्पष्ट गर्न चाहन्छौँ।”
नेपाली कांग्रेसको केन्द्रीय कार्यसमितिले आगामी वैशाखमा नियमित महाधिवेशन गर्ने निर्णय गरे पनि त्यसप्रति असन्तुष्टि जनाउँदै महामन्त्रीद्वय गगन थापा र विश्वप्रकाश शर्माको नेतृत्वमा आइतबारदेखि काठमाडौँको भृकुटीमण्डपमा विशेष महाधिवेशन जारी छ।
विशेष महाधिवेशन अन्तर्गत आज बन्दसत्र सुरु गर्ने तयारी गरिएको छ। आयोजक पक्षका अनुसार महाधिवेशनमा बहुमत महाधिवेशन प्रतिनिधिको सहभागिता रहेको छ। यद्यपि, पार्टी सभापति देउवासहित संस्थापन पक्षका शीर्ष नेताहरू भने विशेष महाधिवेशनमा सहभागी भएका छैनन्।