काठमाडौं– राष्ट्रपति रामचन्द्र पौडेलले प्रधानमन्त्री सुशिला कार्कीको सिफारिसमा प्रतिनिधिसभा विघटन गर्नुभएको छ। राष्ट्रपति कार्यालयले शुक्रबार राति जारी गरेको विज्ञप्तिअनुसार भदौ २७ गते राति ११ बजेदेखि प्रतिनिधिसभा विघटनको निर्णय लागू भएको छ।
नयाँ प्रतिनिधिसभा निर्वाचन आगामी २०८२ साल फागुन २१ गते बिहीबार हुनेगरी मिति तोकिएको छ। राष्ट्रपति कार्यालयले जारी गरेको विज्ञप्तिमा भनिएको छ, “सम्माननीय राष्ट्रपति श्री रामचन्द्र पौडेलज्यूले प्रधानमन्त्री सुशिला कार्कीज्यूको सिफारिस अनुसार प्रतिनिधिसभा विघटन गर्नु भएको छ। उक्त निर्णय २०८२ साल भदौ २७ गते राति ११:०० बजेदेखि लागू हुनेछ।”
संविधानको मर्मअनुसार अब मुलुक नयाँ निर्वाचन प्रक्रियामा प्रवेश गर्ने औपचारिकता सुरु भएको छ। निर्वाचन मिति तोकिएसँगै आगामी दिनमा निर्वाचन आयोगले विस्तृत तालिका र तयारी सार्वजनिक गर्ने अपेक्षा गरिएको छ।
प्रतिनिधिसभा विघटनसँगै वर्तमान अन्तरिम सरकार निर्वाचनसम्म कायम रहनेछ र संवैधानिक दायराभित्र रहेर आवश्यक कार्य सञ्चालन गर्नेछ। साथै, निर्वाचन प्रक्रियाका लागि आवश्यक वातावरण सुनिश्चित गर्ने जिम्मेवारी पनि सरकारलाई दिइएको छ।
राजनीतिक वृत्तमा यस घटनालाई ऐतिहासिक मोडको रूपमा लिइएको छ। यससँगै दलहरूबीच नयाँ सहकार्य वा प्रतिस्पर्धाका सम्भावना बढेका छन्। निर्वाचन नजिकिँदै जाँदा देशभर राजनीतिक चहलपहल तीव्र हुने अनुमान गरिएको छ।
उपसचिव रुपेश जंग थापा मगरद्वारा हस्ताक्षरित विज्ञप्तिमा प्रतिनिधिसभा विघटनको निर्णयलाई राष्ट्रिय हित, राजनीतिक स्थायित्व र लोकतान्त्रिक अभ्यास सुदृढ बनाउन गरिएको दाबी गरिएको छ।
