काठमाडौँ- हाल मनसुनको न्यूनचापीय रेखा सरदर स्थानको आसपासमा अवस्थित छ। यसको प्रभावले कोशी, मधेश र बागमती प्रदेशलगायत देशका पहाडी भूभागमा सामान्य बदली रही बाँकी स्थानमा आंशिक बदली रहेको मौसम पूर्वानुमान महाशाखाले जनाएको छ।
महाशाखाका अनुसार बागमती र गण्डकी प्रदेशको पहाडी भूभागका केही ठाउँमा तथा कोशी, मधेश र लुम्बिनी प्रदेशका एक–दुई स्थानमा हल्कादेखि मध्यम वर्षा भइरहेको छ।
दिउँसो बागमती, गण्डकी, लुम्बिनी र सुदूरपश्चिम प्रदेशसहित देशका पहाडी भूभागमा सामान्य बदली रहनेछ भने बाँकी भूभागमा आंशिक बदली हुने अनुमान गरिएको छ। बागमती, गण्डकी, लुम्बिनी र सुदूरपश्चिमका केही स्थानमा मध्यम वर्षा र लुम्बिनीको तराई तथा कर्णाली र सुदूरपश्चिम प्रदेशको पहाडी क्षेत्रमा भारी वर्षा हुने सम्भावना छ।
राति देशभर सामान्य बदली रहनेछ। पहाडी भूभागका धेरै ठाउँमा मध्यम वर्षा र गण्डकी, कर्णाली, सुदूरपश्चिमको पहाडी क्षेत्र तथा कोशी र लुम्बिनीको तराईका एक–दुई स्थानमा भारी वर्षा हुने महाशाखाले जनाएको छ।
