काठमाडौं- कञ्चनपुरका विपिन जोशीको रिहाइका लागि अन्तर्राष्ट्रिय दबाब सिर्जना गर्ने उद्देश्यले उनकी आमा पद्मा जोशी र बहिनी पुष्पा जोशी सोमबार बिहान इजरायल प्रस्थान गरेका छन्।
उनीहरू फ्लाइ दुबईको विमानमार्फत इजरायल गएका हुन्। इजरायल सरकारले विपिनको रिहाइ अभियानलाई सशक्त बनाउनका लागि उनीहरूलाई त्यहाँ बोलाएको हो।
विपिन ‘सिक्दै कमाउँदै’ कार्यक्रमअन्तर्गत इजरायल पुगेका थिए। वि.सं. २०८० असोज २० गतेदेखि उनी परिवारसँग सम्पर्कविहीन छन्। हमासद्वारा कब्जामा रहेका कैयौं बन्दी मुक्त भइसके पनि उनको अवस्थाबारे अहिलेसम्म जानकारी प्राप्त भएको छैन।
गत हमास आक्रमणमा १० नेपाली विद्यार्थीको मृत्यु भएको थियो। त्यही क्रममा, हमासले फालेको ‘ग्रिनेड’ सुरक्षित स्थानतर्फ फालेर साथी नेपाली विद्यार्थीहरूलाई जोगाउन खोज्ने क्रममा विपिनलाई हमासले बन्धक बनाएर लगेको बताइन्छ।
