काठमाडौं- हाल देशभर मनसुनी वायुको प्रभाव सक्रिय रहेको मौसम पूर्वानुमान महाशाखाले जनाएको छ। मनसुनको न्यून चापीय रेखा सरदर स्थानको आसपासमा रहेकाले आज र भोलि देशका धेरैजसो स्थानमा वर्षाको सम्भावना रहेको छ।
शनिबार दिउँसो देशभर आंशिकदेखि सामान्य बदली रहनेछ। कोशी, बागमती, गण्डकी र सुदूरपश्चिम प्रदेशका पहाडी तथा केही अन्य भागहरूमा मेघगर्जन र चट्याङसहित हल्कादेखि मध्यम वर्षा हुने अनुमान गरिएको छ।
आज राति कोशी प्रदेशका धेरै स्थानमा, मधेश, बागमती र गण्डकीका केही स्थानमा तथा अन्य केही भागमा पनि वर्षाको सम्भावना रहेको छ। कोशी र गण्डकीका एक–दुई स्थानमा भारी वर्षा समेत हुन सक्ने पूर्वानुमान छ। उच्च पहाडी तथा हिमाली भू–भागमा हल्कादेखि मध्यम वर्षा र हिमपातको सम्भावना पनि रहेको महाशाखाले जनाएको छ।
वर्षाका कारण भू–क्षय, बाढी, पहिरो, गेग्रान बहाव तथा शहरी र तराई क्षेत्रहरूमा डुबानको जोखिम बढ्न सक्ने भएकाले सतर्कता अपनाउन महाशाखाले सबैलाई अनुरोध गरेको छ। यसले यातायात, कृषि, स्वास्थ्य, पर्यटन र निर्माण कार्यमा असर पार्न सक्ने भएकाले पूर्व तयारी गर्न पनि आग्रह गरिएको छ।
