बझाङ, मष्टा —
सुदूरपश्चिमको विकट बस्ती मष्टा गाउँपालिकामा विकासको उज्यालो फैलाउन इन्जिनियर दीपक बोहराको योगदान उल्लेखनीय बन्दै गएको छ। दुर्गम भौगोलिक अवस्थाका बाबजुद उनले हालै गाउँपालिकाभित्र सम्पन्न गरेका पूर्वाधार विकासका आयोजनाहरूले स्थानीयको जीवनस्तरमा सकारात्मक परिवर्तन ल्याएको छ।
बोहरा हाल मष्टा गाउँपालिकामा कार्यरत छन्। उनको प्राविधिक नेतृत्वमा वडा नं. १ को कोटदेवलमा १० कोठे आधुनिक स्वास्थ्य चौकी भवन निर्माण कार्य समयमै सम्पन्न भएको छ। कठिन भौगोलिक क्षेत्र, यातायात सुविधा अभाव, मौसमीय चुनौती जस्ता अवरोधका बीच तीन महिनामा गुणस्तरीय संरचना निर्माण गर्नु आफैँमा एक उपलब्धि हो।
उक्त भवन निर्माणमा उपभोक्ता समितिको सक्रिय सहभागिता रहँदा इन्जिनियर बोहराको समन्वयात्मक क्षमता झन् प्रशंसा योग्य देखिएको छ।
स्थानीयहरूका अनुसार उनका कामले सरकारी सेवा र विकासप्रतिको विश्वास बढाएको छ। शिक्षा, स्वास्थ्य तथा ग्रामीण पूर्वाधार निर्माणमा बोहराले प्राविधिक सल्लाह र निर्देशन दिँदै आएका छन्।
इन्जिनियर बोहरा भन्छन्,
“विकास केवल योजनामा सीमित रहनु हुँदैन, जनताको घरआँगनसम्म पुग्नुपर्छ। यही सोचले मलाई उत्प्रेरित बनाउँछ।”
उनको इमान्दारिता, समयपालन, र व्यवहारिक नेतृत्वले गाउँपालिकामा प्राविधिक सेवा अब जनताको पहुँचमै पुगेको अनुभूति भएको स्थानीयहरूको भनाइ छ।
दीपक बोहराजस्ता युवा इन्जिनियरहरू देशको दुर्गम भूगोलमा कर्मयोगी बनेर कार्यरत हुनु, राष्ट्र निर्माणको आशालु संकेत हो।
