किएभ– युक्रेनले रुससँगको युद्धमा मारिएका आफ्ना सयौँ सैनिकको शव फिर्ता पाएको जनाएको छ। पछिल्लो तीन हप्तामा यो दोस्रो पटक शव फिर्ता गरिएको हो।
युक्रेनी सरकारी एजेन्सी ‘युद्धका कैदीहरूको उपचारका लागि समन्वय मुख्यालय’ का अनुसार, ९०९ युक्रेनी रक्षकको शव स्वदेश फर्काइएको हो। रुसले सन् २०२२ मा युक्रेनमाथि आक्रमण गरेयता युद्धबन्दी र मृतक सैनिकहरूको आदानप्रदान दुई देशबीचको दुर्लभ सहकार्य बनिरहेको छ।
रुसले भने आफ्ना मृत सैनिकबारे सार्वजनिक जानकारी दिन खासै रुचि देखाउँदैन। तर, रूसी मिडिया र सैन्य ब्लगरहरूले सांसद शमसेल सारालिभलाई उद्धृत गर्दै ४१ रूसी सैनिकको शव फिर्ता गरिएको जनाएका छन्।
यो आदानप्रदान अमेरिका नेतृत्वको युद्धविराम प्रयास असफल देखिएको समयसँग मेल खान्छ। दुवै पक्षका दशौँ हजार सैनिक मारिएको अनुमान छ, तर दुबै देशले नियमित विवरण सार्वजनिक गरेका छैनन्।
यस वर्ष फेब्रुअरीमा, युक्रेनी राष्ट्रपति भोलोदिमिर जेलेन्स्कीले एनबीसी न्यूजलाई दिएको अन्तर्वार्तामा ४६ हजारभन्दा बढी युक्रेनी सैनिक मारिएको र झण्डै ३ लाख ८० हजार घाइते भएको बताएका थिए।
रुसले भने २०२२ को शरदयाम पछाडि आफ्ना क्षतिबारे कुनै तथ्याङ्क सार्वजनिक गरेको छैन। त्यसअघि उसले करिब ६ हजार सैनिकको मृत्यु भएको दाबी गरेको थियो।
बीबीसीको रूसी सेवा र मिडियाजोनाको अनुसन्धान अनुसार, सन् २०२२ देखि हालसम्म करिब एक लाख रूसी सैनिकको मृत्यु पुष्टि भएको छ, जुन सार्वजनिक रूपमा उपलब्ध सूचनाको आधारमा तयार गरिएको हो।
