बझाङ– जापानी कराँतेमा विश्व रेकर्ड कायम गरेका बझाङका खेलाडी अन्सु कुमार खड्कालाई राष्ट्रिय स्वतन्त्र पार्टी (रास्वपा) बझाङले खाँदामाला र नेपालको झण्डा ओडाएर सम्मान गरेको छ।
अन्सु कुमार खड्का मष्टा गाउँपालिकाका स्थायी बासिन्दा हुन्, जो हाल भारतमा बसोबास गर्दै आएका छन्। उनले जापानी कराँते प्रतियोगितामा सहभागिता जनाई २२०० प्रतिस्पर्धीलाई पराजित गर्दै नयाँ विश्व कीर्तिमान कायम गरेका थिए। खड्काले अघिल्लो रेकर्ड तोड्दै नयाँ रेकर्ड कायम गर्न सफल भएका हुन्।
रास्वपा बझाङले शनिबार एक विशेष कार्यक्रमको आयोजना गरी उनलाई सम्मान प्रदान गरेको हो। कार्यक्रममा जिल्ला सभापति सत्यराज उपाध्याय, सुदूरपश्चिम प्रदेश महामन्त्री सन्तोष राज जोशी, निवर्तमान जिल्ला सभापति नगेन्द्र ब. खड्का, पार्टीका जिल्ला पदाधिकारी, सदस्यहरू, शुभेच्छुक र सर्वसाधारणको उल्लेखनीय उपस्थिति रहेको थियो।
खड्काको यस ऐतिहासिक उपलब्धिले मात्र व्यक्तिगत सफलता होइन, सिंगो बझाङ जिल्लाको गर्वसमेत बढाएको छ।
