बझाङ- सुदूरपश्चिमको धार्मिक तथा ऐतिहासिक चर्चित बान्नीकी चैतली मेलाको अवसरमा क्रिकेट प्रतियोगिताको आयोजना गरिएको छ ।
जिल्लाको छबिसपाथिभेरा गाउँपालिका–३ मा लाग्ने उक्त मेलाको अवसरमा आदर्श युवा क्लब बान्नीकोटले बडा स्तरीय खुल्ला क्रिकेट प्रतियोगिता आयोजना गर्न लागेको हो ।
प्रतियोगितामा प्रथम हुने टिमले नगद ८१ हजार ६२० र द्वितीय टिमले ३५ हजार ६२० प्राप्त गर्नेछन् ।
टिम दर्ता समय २७ गते १२ बजेसम्म रहेको छ, भने खेल सोही दिन १ बजेबाट सुरु हुनेछ । टिम दर्ता शुल्क ४ हजार रुपैयाँ तोकिएको छ।
उत्कृष्ट ब्याट्सम्यान र उत्कृष्ट बलरलाई पनि विशेष पुरस्कार प्रदान गरिने क्रिकेट संयोजक हिक्मत बोहराले जानकारी दिए । छ। टिम दर्ता गर्दा आफू बडामा बसोबास गरेको प्रमाण खुल्ने कागज अनिवार्य पेस गर्नुपर्नेछ।
बान्नीकी चैतली मेलाको किंवदन्ती
यो मेला हरेक वर्ष चैत शुक्ल त्रयोदशीका दिन बान्निकोटमा लाग्ने गर्दछ ।
परापूर्वकालमा महिषासुर दानवले बान्नी मष्टा देवतालार्ई पासोमा पारेको र मष्टालाई दानवको पासोबाट बचाउनका लागी सुर्मादेवी प्रकट भई दानवको बध गरेको खुसीयालीमा बान्नीकी चैतली मेला लाग्ने गरेको त्यहाँका स्थानिवासीहरू बताउँछन् । स्थानीयहरूका अनुसार राक्षसलाई मारी सकेपछि सुर्मा देवीले राक्षस (दानव) को टाउको काटी भकुन्डो बनाएर खेलेको, पेटको छाला निकालेर दमाहा बाजा बनाएको र हातका औँलाको (गजा) दमाह बजाउने काठको छडी बनाएको हुँदा यसैलाई आधार मानी विजय उत्सव मनाउने गरेको बताउँछन् ।
सुर्मा देवीले भाला प्रहार गरेर दानवको बध गरेको प्रतिकका रूपमा चैत्र औँशीका दिन जंगलमा गई सल्लोको झन्डै १७ मिटर स्थानीय भाषामा कांकर ल्याउने गरेको (लिङ्गो) चैत शुक्ल त्रयोदशीका दिन तोलेनी भन्ने ठाँउमा हिँडाउने चलन रहीआएको छ ।
