काठमाडौँ- नेपाल शिक्षक महासंघले चैत २५ गतेदेखि देशव्यापी आम शैक्षिक हड्तालको घोषणा गरेको छ। शिक्षा ऐन शिक्षक–कर्मचारीमैत्री बनाउन माग गर्दै महासंघले आन्दोलनलाई थप सशक्त बनाउन सोमबारदेखि सबै विद्यालय बन्द गर्ने निर्णय लिएको हो।
महासंघका अध्यक्ष लक्ष्मीकिशोर सुवेदीले शिक्षक तथा कर्मचारीहरूलाई काठमाडौंमा हुने शैक्षिक सडक आन्दोलनमा अनिवार्य रूपमा सहभागी हुन आह्वान गरेका छन्।
शिक्षक महासंघ माघ २० गतेदेखि निरन्तर आन्दोलनमा रहेको छ। सरकारसँगको औपचारिक संवाद असफल भएपछि महासंघले आन्दोलनलाई थप तीव्र बनाउँदै हड्तालको घोषणा गरेको हो।
हड्तालको अवधिमा उत्तरपुस्तिका परीक्षण, नतिजा प्रकाशन, तालिम गोष्ठी, सेमिनार र शैक्षिक भ्रमण लगायत कुनै पनि कार्यमा संलग्न नहुन महासंघले सबै शिक्षकहरूलाई आग्रह गरेको छ।
शिक्षकहरू आन्दोलनमा संलग्न भएकाले एसईईको उत्तरपुस्तिका परीक्षण प्रभावित भई नतिजा प्रकाशितमा ढिलाइ हुने स्पष्ट संकेत देखिएको छ।
यद्यपि शिक्षा मन्त्रालयले संवादका लागि पहल गरिरहेको भए पनि महासंघले प्रधानमन्त्रीसँग प्रत्यक्ष वार्ता गर्नुपर्ने माग राख्दै आएको छ।
