धनगढी – कैलालीको चुरे गाउँपालिकाका बाढी, पहिरो प्रभावितहरुको विचल्ली भएको छ । थातथलोबाट विस्थापित भएको तीन वर्ष भए पनि पुनःस्थापना हुन नसक्दा उनीहरुको विचल्ली भएको हो ।
सो गाउँपालिकाको वडा –४, ५ र ६ को विभिन्न गाउँका स्थानीय बाढी, पहिरोको कारण विस्थापित भएका छन् । पुनःस्थापनाको पर्खाइमा रहेका ती परिवार टहरामुनि चिसोरात काट्दैआएका छन् ।
विस्थापित केही परिवारका सदस्य आफन्तको घरमा बसे पनि धेरैजसो जङ्गलमा टहरा बनाएर बसिरहेको गाउँपालिकाका अध्यक्ष चक्रबहादुर बोगटीले बताए । उनका अनुसार सुरुमा ५१८ परिवार विस्थापित भएका थिए । जसमध्ये १२० परिवारको केही पनि बचेको छैन । नम्बरी जग्गा भएका ती परिवारले घरखेत गुमाएका छन् ।
गाउँपालिकाले उनीहरुको पुनःस्थापनाका लागि सरोकारवाला निकायमा पहल गरिरहेको जनाएको छ । सम्भवतः दुई महिनाभित्र उनीहरुको पुनःस्थापना गर्नेगरी प्रक्रिया अगाडि बढाइएको अध्यक्ष बोगटीले बताए । उनीहरुलाई घरजग्गाका लागि जिल्ला विपद् व्यवस्थापन समितिमार्फत रकम उपलब्ध गराउने गरी व्यवस्थापनको प्रक्रिया अगाडि बढाइएको छ । कार्यविधि बनिसकेको गाउँपालिकाको कार्यालयले जानकारी दिएको छ ।
नम्बरी जग्गा गुमाएका प्रतिपरिवारलाई घर बनाउने जग्गा खरिदका लागि तीन लाख रुपियाँ र घर बनाउनका लागि चार लाखगरी सात लाख रुपियाँ उपलब्ध गराइने जनाइएको छ । अध्यक्ष बोगटीका अनुसार पहिरो तथा बाढी विस्थापितका लागि सङ्घले ६० प्रतिशत, प्रदेशले ३० र सम्बन्धित स्थानीय तहले १० प्रतिशत रकम जिल्ला विपद् व्यवस्थापन समितिको कोषमा जम्मा गर्नेगरी कार्यविधि बनेको छ ।
“जम्मा भएको पैसा सम्बन्धित पीडितहरुलाई जिल्ला प्रशासन कार्यालयमार्फत उपलब्ध हुनेछ” अध्यक्ष बोगटीले बताए । चुरेको वडा नम्बर ४ का सउन, बाजी, वनद्वार, वडा नम्बर ५ का काफलगैडा, पटरेनी, गुणी, खानीडाँडा काफलगैडा र सल्लेरी गाउँका मान्छे विस्थापित छन् ।
यस्तै, वडा नम्बर ६ को बगेडी, बसडी, गौजना, तल्लो गौजना, तितरे लगायतका गाउँका स्थानीय बाढी, पहिरोका कारण विस्थापित भएर कष्टकर जीवनयापन गर्दैआएको बताइएको छ । -गोरखापत्रबाट
