धनगढी- धनगढीमा मदिरा सेवन गरेर मातेका एक व्यवसायीमाथि कुटपिट भएको घटना सार्वजनिक भएको छ। तर, घटनापछि पीडित भनिएका व्यवसायीले कानुनी उपचार खोज्नुको सट्टा ‘पावर’को दम्भ देखाउँदै विभिन्न किसिमका धम्की दिएको आरोपसमेत लागिरहेको छ।
चैत १६ गते सोमबार राति करिब साढे १ बजे धनगढी–४ स्थित दक्षिणकाली मार्गको ६ लेन सडकमा व्यवसायी विकास सिङ्घल माथि कुटपिट भएको बताइएको छ। सिङ्घलले प्रदेश र जिल्लाका उच्च पदस्थ प्रहरी अधिकारीहरूसँग राम्रो सम्बन्ध रहेको दाबी गर्दै आफूले जुनसुकै बेला जे पनि गर्न सक्ने भन्दै धम्की दिएको आरोप घटनामा संलग्न भनिएका पक्षले लगाएका छन्। साथै, उनले प्रहरी अधिकारीहरूलाई सिद्धार्थ लगायतका होटलमा खानपिन गराउने गरेको दाबी पनि गरिएको छ।
उनीकै घरमा भएको छलफलका क्रममा कुटपिटमा संलग्न व्यक्तिहरूको सार्वजनिक रूपमा बेइज्जत गर्न मिडियाको प्रयोग गर्ने चेतावनी दिएको आरोपसमेत लागेको छ।
तर सिङ्घल पक्षले भने आरोप अस्वीकार गर्दै घटनाको फरक विवरण दिएको छ। उनका अनुसार, घर अगाडि पार्किङ गरिएको ईभी हायस गाडी हटाउन चालकलाई बोलाउँदा सडकपारि पूर्वतर्फ हिँडिरहेका चार जना व्यक्तिहरू आएर बिना कारण निर्घात कुटपिट गरेका थिए।
सिङ्घलकी पत्नी डाक्टर अनिसा अग्रवाल ले तीन पटकसम्म फर्केर कुटपिट गरिएको दाबी गरेकी छन्। उनले पाँच वर्षीया छोरीकै अगाडि आफ्ना श्रीमानमाथि आक्रमण भएको बताएकी छन्।
घटनाबारे कैलाली प्रहरीमा ठाडो निवेदन दिइएको र सोही आधारमा एक जना युवा पक्राउ परे पनि उनलाई हाजिरी जमानीमा छोडिएको प्रहरीले जनाएको छ। कैलाली प्रहरीका प्रवक्ता प्रहरी नायब उपरीक्षक (डीएसपी) योगेन्द्र तिमिल्सिना का अनुसार पीडित पक्षबाट किटानी जाहेरी नपरेकाले पक्राउ परेका व्यक्तिलाई छोड्नुपरेको हो।
प्रहरीले भने किटानी जाहेरी प्राप्त भएलगत्तै घटनाको अनुसन्धान प्रक्रिया अघि बढाइने जनाएको छ।
Advertisement
