- बझाङ- बझाङको मष्टा गाउँपालिकाले बेरोजगार युवालाई लक्षित गर्दै निःशुल्क सीपमूलक तालिम सञ्चालन गर्ने भएको छ। गाउँपालिकाको कार्यालयले सूचना जारी गर्दै पोखरा भ्याली प्राविधिक तालिम संस्था प्रा. लि (Pokhara Valley Technical Training Institute Pvt. Ltd.) सँगको सहकार्यमा विभिन्न विषयमा तालिम सञ्चालन गर्न लागिएको जनाएको हो।
सूचनाअनुसार सिलाइ कटाइ, डकर्मी (प्लम्बर र फलाम बाँध्ने काम), इलेक्ट्रोनिक्स तथा मोबाइल मर्मत, तथा आधारभूत घरायसी विद्युत् जडान सम्बन्धी तालिम सञ्चालन गरिनेछ। तालिमको अवधि ४ देखि ६ महिनासम्म रहनेछ।
तालिममा सहभागी हुन १७ देखि ४० वर्ष उमेर समूहका व्यक्तिहरू योग्य हुनेछन् भने शैक्षिक योग्यता सामान्य लेखपढदेखि कक्षा ८ उत्तीर्णसम्म तोकिएको छ। प्रत्येक तालिममा सीमित संख्यामा सहभागी लिइनेछ।
इच्छुक व्यक्तिहरूले तोकिएको मितिभित्र गाउँपालिकाको रोजगार सेवा केन्द्रमा आवेदन दिनुपर्ने पालिका निमित्त प्रमुख प्रशासकीय अधिकृत दिपक बहादुर बोहराले बताए । आवेदनका लागि नेपाली नागरिकताको प्रतिलिपि, पासपोर्ट साइज फोटो, शैक्षिक प्रमाणपत्र, अभिभावक मञ्जुरी (नाबालकका लागि) लगायतका कागजात आवश्यक पर्नेछन्।
तालिम पूर्ण रूपमा निःशुल्क हुने गाउँपालिकाले जनाएको छ। साथै सहभागीलाई खाना बस्नको व्यवस्था, प्रत्येक महिना एक हजार निर्वाह भत्ता तथा आवतजावत खर्चसमेत उपलब्ध गराइनेछ।
निमित्त प्रमुख प्रशासकीय अधिकृत बोहरा ले यस्तो तालिमले स्थानीय युवालाई सीपयुक्त बनाई रोजगारी तथा आत्मनिर्भर बन्न सहयोग पुग्ने बताए।
गाउँपालिकाले उक्त तालिमबाट स्थानीयस्तरमै रोजगारी सिर्जना हुने अपेक्षा गरेको छ ।
गाउँपालिका द्वारा जानकारी सूचना 
