देउलेख- बझाङको बित्थडचिर गाउँपालिकाका प्रमुख प्रशासकीय अधिकृत श्रीधर ज्ञवाली डेढ महिनामै सरुवा भएका छन् । ज्ञवाली कार्तिक १८ गते गाउँपालिकाको कार्यालयमा हाजिर भएका थिए । संघीय मामिला तथा सामान्य प्रशासन मन्त्रालयले गत भदौ १२ गते श्रम तथा रोजगार मन्त्रालयमा कार्यरत ज्ञवालीलाई बित्थडचिर गाउँपालिकामा खटाएको थियो ।
सरुवा भएसँगै ज्ञवाली अब संघीय मामिला तथा सामान्य प्रशासन मन्त्रालय जाने तयारीमा रहेका छन् । प्रमुख प्रशासकीय अधिकृत सरुवा भएपछि गाउँपालिका केही समयका लागि प्रशासकीय नेतृत्वविहीन हुने भएको छ, जसका कारण प्रशासनिक कामकाज प्रभावित हुने देखिएको छ । सरुवा भएका प्रमुखको गाउँपालिकाले मंगलबार उनको कार्यको सम्मान सहित बिदाइ गर्दैछ ।
यता गाउँपालिकाले नयाँ प्रमुख प्रशासकीय अधिकृत पठाइदिन माग गर्दै सम्बन्धित मन्त्रालयमा पत्राचार गर्ने तयारी गरेको जनाएको छ ।
छोटो समयमा नमुनात्मक काम
डेढ महिनाको छोटो कार्यकालमै प्रमुख प्रशासकीय अधिकृत ज्ञवालीले गाउँपालिकामा नमुनात्मक र महत्वपूर्ण सुधारात्मक कामहरू गरेका छन् । उनले गाउँपालिकामा सुशासन कायम गर्न पहल, मासिक प्रगति विवरण तयार गर्ने प्रणाली, तथा स्व–तह प्रशासन कार्यको सुरुवात गरेका छन् ।
सेवा प्रवाहलाई प्रभावकारी बनाउन उनले प्रत्येक बिहान आधा घण्टा कर्मचारीसँग दैनिकी कार्ययोजना सम्बन्धी छलफल गर्ने अभ्यास सुरु गरिएको छ । त्यसैगरी कर्मचारीलाई कामप्रति उत्तरदायी बनाउन दैनिक प्रगति विवरण राख्ने व्यवस्था, वार्षिक योजनाको कार्ययोजना तयारी, तथा दरबन्दी बाहेकका अस्थायी कर्मचारी हटाइएको छ ।
यसका साथै, उनले आफूले प्राप्त गरेको प्रमुख प्रशासकीय अधिकृत सम्बन्धी तालिमको ज्ञान कर्मचारीलाई प्रशिक्षणमार्फत हस्तान्तरण गरेको बताए ।
