काठमाण्डौ- वर्षाको कारण बाटो हिलाम्ये बनेपछि बुटवल–नारायणगढ सडकखण्डअन्तर्गत दाउन्ने क्षेत्रमा यातायात सञ्चालनमा समस्या आएको छ। पानी पर्न रोकिए पनि सडक चिप्लो र हिलो भएकाले गाडीको लामो जाम लागेको जिल्ला प्रहरी कार्यालय, नवलपरासी (पूर्व) ले जनाएको छ।
पूर्व–पश्चिम राजमार्गको दाउन्ने खण्डमा कतिपय ठाउँमा सडक अत्यधिक हिलाम्ये भएकाले एकतर्फी रूपमा मात्र गाडी सञ्चालन भइरहेका छन्। यसले यात्रुहरूलाई कठिनाइ भएको प्रहरीले जनाएको छ।
दाउन्ने नजिकैको घ्यू खोलामा गाडी फस्ने घटना बारम्बार भइरहेकाले गएराति केही समयका लागि यातायात पूर्ण रूपमा अवरुद्ध भएको थियो। प्रहरीले यात्रुहरूलाई आवश्यक सावधानी अपनाई र बाटोको अवस्था बुझेर मात्रै यात्रा गर्न आग्रह गरेको छ।
