बझाङ- बझाङको दुर्गाथलि गाउँपालिकाले जेन–जी आन्दोलनका क्रममा ज्यान गुमाएका परिवारलाई आर्थिक सहयोग गर्ने घोषणा गरेको छ । भदौ २३ र २४ गते जेन-जी पुस्ताले राजनीतिक दलहरूको असफलता, नेतृत्वप्रति अविश्वास, भ्रष्टाचारका बिरुद्ध गरेको आन्दोलनमा बझाङका दुई जनाले ज्यान गुमाएका थिए । उनीहरूको परिवारलाई पालिकाले एक–एक लाख रुपैयाँ सहयोग गर्ने घोषणा गरेको हो।
गाउँपालिकाले आइतबार जारी विज्ञप्तिमा ऐतिहासिक आन्दोलनका क्रममा वीरगति प्राप्त शहीदप्रति हार्दिक श्रद्धाञ्जली अर्पण गर्दै शोकसन्तप्त परिवारप्रति समवेदना प्रकट गरेको छ। साथै आन्दोलनमा घाइते भएकाहरूको शीघ्र स्वास्थ्यलाभको शुभकामना पनि व्यक्त गरिएको छ।
आन्दोलनका क्रममा ज्यान गुमाएका दुर्गाथलिका भीम धामी र खप्तडछान्नीका सुवास बोहराको उच्च बलिदानलाई स्मरण गर्दै गाउँपालिकाले उनीहरूको परिवारलाई राहतस्वरूप नगद एक–एक लाख रुपैयाँ उपलब्ध गराउने निर्णय गरेको हो ।
गाउँपालिका अध्यक्ष दिल बहादुर थापाले हस्ताक्षर गरेको विज्ञप्तिमा देश र जनताको लागि गरिएको बलिदानलाई सदैव स्मरण गरिने उल्लेख गरिएको छ।
