धनगढी- मनसुनको न्यूनचापीय रेखा नेपालको तराई भूभागमा सक्रिय रहेकाले देशभर वर्षाको सम्भावना रहेको मौसम पूर्वानुमान महाशाखाले जनाएको छ। जलवाष्पयुक्त हावाको प्रभाव केही कमजोर भए पनि कोशी, मधेस, बागमती, गण्डकी, लुम्बिनी र कर्णाली प्रदेशमा बदलीसहित वर्षा भइरहेकाे छ।
दिउँसो लुम्बिनी, कर्णाली र सुदूरपश्चिम प्रदेशका पहाडी र तराई भूभागमा व्यापक वर्षाको सम्भावना रहेको छ। त्यस्तै, अन्य प्रदेशका पहाडी तथा केही तराई भूभागमा पनि मध्यम वर्षा हुने सम्भावना छ।
राति पनि देशभर सामान्यतया बदली रहनेछ भने कोशी र बागमती प्रदेशका पहाडी क्षेत्रमा एक-दुई स्थानमा भारी वर्षा हुन सक्ने महाशाखाको पूर्वानुमान छ।
कोशी, बागमती, लुम्बिनी, कर्णाली र सुदूरपश्चिम प्रदेशका पहाडी भूभागमा भारी वर्षाको सम्भावना रहेकोले सतर्कता अपनाउन महाशाखाले आग्रह गरेको छ।
