बझाङ,
सशस्त्र प्रहरी बल नेपाल बझाङका डिएसपी दुर्गाप्रसाद भट्टको सरुवा भएपछि जिल्लाभर भावुकता छाएको छ। लामो समयदेखि बझाङ जिल्लामा सेवा दिँदै आएका डिएसपी भट्ट धनगढीको अत्तरियामा सरुवा भएपछि स्थानीयवासी र सुरक्षाकर्मीहरू भावुक बनेका छन्।
करिब एक वर्षभन्दा बढी समयसम्म बझाङमा कार्यरत रहँदा उनले जनतासँगको निकट सम्बन्ध, सरल व्यवहार र शान्ति सुरक्षामा देखाएको सक्रियताले उनलाई अत्यन्त लोकप्रिय बनाएको थियो। दुर्गम जिल्ला बझाङमा खटिँदा उनले प्रशासनिक मात्र नभइ मानवीय सेवा पनि उल्लेखनीय रूपमा पुर्याएका थिए।
स्थानीयहरूका अनुसार डिएसपी भट्ट सदरमुकाम चैनपुरस्थित प्रहरी ब्यारेकबाट दिनमा दुई पटक बजार अनुगमन गर्न नछोड्ने अधिकारी थिए। “उहाँ बजारमा नआएमा आज डिएसपी कता होलान् भन्ने चिन्ता हुन्थ्यो,” एक स्थानीयले भने, “हामी उहाँका ठूला फ्यान थियौं।”
उनको व्यवहार, नेतृत्वशैली र समुदायसँगको आत्मीयता स्थानीयवासीका लागि प्रेरणादायी बनिरहेको थियो। समाजका दुखी, गरिब, अशक्त तथा बृद्धबृद्धालाई सहयोग गर्नु उनको दैनिकीजस्तै थियो। जयपृथ्वी नगरपालिका–७ सुवेडाका एक ७० वर्षीय वृद्धले भने, “उहाँले मलाई आफ्नै गाडीमा राखेर घरसम्म पुर्याउनु भयो। यस्तो मान्छे त भगवानजस्तै लाग्यो।”
डिएसपी भट्टको सरुवाले नागरिक समाज, पत्रकार, सुरक्षाकर्मी र सर्वसाधारणमा गहिरो निराशा छाएको छ। जिल्लाका थुप्रै कार्यक्रममा उनको उपस्थिति अनिवार्यझैँ मानिन्थ्यो। उनी नभएका कार्यक्रममा खल्लो महसुस हुने गरेको सहभागीहरूको भनाइ छ।
जनसमुदायसँग आत्मीय सम्बन्ध बनाएका, अनुशासित र सेवामुखी डिएसपी भट्टको योगदानलाई बझाङबासीहरूले कहिल्यै भुल्न सक्दैनन्। “सरुवा नभएको भए राम्रो हुन्थ्यो,” भनी धेरैजसोले प्रतिक्रिया जनाएका छन्।
बझाङका लागि एउटा प्रेरणादायी सेवा यात्रामा अब विश्राम लिँदै अत्तरियातर्फ प्रस्थान गरेका डिएसपी दुर्गाप्रसाद भट्टको आगामी कार्यकाल सफल रहोस् भन्ने शुभकामनासहित बझाङले बिदाई गरेको छ।
