बझाङ, मष्टा
मष्टा गाउँपालिकाले आगामी आर्थिक वर्ष २०८२/०८३ का लागि ४४ करोड ३५ लाख २१ हजार रुपैयाँको अनुमानित बजेट सार्वजनिक गरेको छ।
गाउँपालिकाको १२ औं गाउँसभा अधिवेशनमार्फत उक्त बजेट उपाध्यक्ष हर्क बहादुर धामीले मंगलबार प्रस्तुत गर्नु भएको हो।
सभामा बोल्दै गाउँसभा अध्यक्ष ज्ञानबहादुर बोहराले बजेटका प्राथमिकता क्षेत्रहरूबारे जानकारी दिनुहुँदै भन्नुभयो, “शिक्षा, कृषि, रैथाने बाली, उद्यमशिलता, पर्यटन, सूचना प्रविधि र गुणस्तरिय भौतिक पूर्वाधार विकास तथा डिजिटलमैत्री सेवा प्रवाहलाई केन्द्रमा राखेर आगामी वर्षको योजना बनाइएको छ।”
यससँगै, धार्मिक तथा सांस्कृतिक सम्पदाको संरक्षण र प्रवर्द्धनमा समेत गाउँपालिकाले ध्यान केन्द्रित गरेको छ। तपवन र मष्टा माणु जस्ता धार्मिक स्थलहरूलाई लक्षित गर्दै विशेष कार्यक्रमहरू बजेटमा समावेश गरिएका छन्।
बजेटले गाउँपालिकाको समावेशी र समृद्ध विकासको खाका कोर्ने विश्वास स्थानीयहरूले व्यक्त गरेका छन्। डिजिटल सेवा प्रणालीलाई प्राथमिकता दिएर नागरिक सेवा प्रवाहमा पारदर्शिता र सहजता ल्याउने गरी योजना बनाइएको जनाइएको छ।
