धनगढी : कैलालीको घोडाघाडी नगरपालिका–१ स्थित सुखडको राष्ट्रिय कलेजमा भर्ना नै नभएका एक व्यक्ति स्ववियु सभापति बनेका छन् भन्ने खुलासा भएको छ ।
चैत्र ४ गते सम्पन्न स्ववियु निर्वाचनमा अनेरास्ववियु र नेविसंघको संयुक्त गठबन्धनका उम्मेदवारलाई माओवादी निकट अखिल (क्रान्तिकारी) का सुन्दर गौतमले भारी मतान्तरले पराजित गर्दै सभापति निर्वाचित भएका थिए ।
एमाले र कांग्रेसका भातृ संगठनहरूको गठबन्धनसँग प्रतिस्पर्धा गर्दै गौतमले ९७ मतले जित हात पारेका थिए । दोस्रो स्थानमा रहेका अखिल समाजवादीका माइकल चौधरी ९२ मतले पछि परे ।
तर, विजयी गौतम राष्ट्रिय कलेजमा नामै नदिई उम्मेदवार बनेको प्रमाण खुलेको हो । स्नातक तह सकिसकेका उनले स्नातकोत्तर तहमा भर्ना नगरीकनै दोहोर्याएर उम्मेदवारी दिएका थिए । अघिल्लो कार्यकालमा पनि उनी सभापति थिए ।
भर्ना नभएका गौतमको नाम कलेजको भर्ना रजिस्टरमा समावेश गर्न क्याम्पसका केही कर्मचारी संलग्न भएको प्रारम्भिक अनुसन्धानले देखाएको छ ।
स्नातक पहिलो वर्षमा अध्ययनरत यमुना बोहराले २०८१ फागुन १३ गते भर्ना शुल्क तिरेको १६६/११२४३ नम्बरको रसिद देखिन्छ। सोही रसिद नम्बर सार्वजनिक गर्दै गौतमले भर्ना गरेको प्रमाणित गर्ने प्रयास भएको पाइएको छ, तर उक्त रसिद यमुना बोहराको नाममा रहेको पुष्टिको साथ प्रमाणित भएको छ ।
स्ववियु सभापति निर्वाचित भएको करिब एक डेढ महिना पछि गौतम फर्जी विद्यार्थी रहेको र किर्ते प्रमाणहरू तयार गरेको खुलेको हो । गौतमले केही प्राध्यापकहरूलाई आफ्नो भर्ना गरिदिन र शुल्क समेत तिर्न भनेका आरोप छ। तर, गौतमले भनेका व्यक्तिले तोकिएको समयसम्म रकम दाखिला गरेर भर्ना नगरेपछि उनको भर्ना छुटेको थियो । त्यसपछि स्ववियु निर्वाचन नजिकिएपछि कर्मचारीहरूले नै फर्जी कागजात तयार गरेका हुन् ।
क्याम्पस प्रमुख देवेन्द्र कुमार प्रसाईंले आफूले पहिले थाहा नभएको र अहिले विद्यार्थी भर्ना नभएको बारे जानकारी पाएको बताएका छन । स्ववियु निर्वाचन संयोजक प्रभात बोगटीले मतदाता नामावली माग गरेको र लेखा शाखाबाट दिएको नामावली अनुसार अन्तिम नामावली प्रकाशन गरेको बताए ।
लेखापाल लक्ष्मण चौधरीलाई गौतमले इन्ट्रान्समा नाम निकालेको बताउँदै आफै पैसा हालेर भर्ना गरिदिन भनेका थिए। ‘चुनाव आयो। मेरो नाम चढाइदिन भन्नु भयो। विना रकमको हुँदैन भने। रकम दिनु पर्छ, रकम नभईकन भोलिका दिनमा मैले जवाफ दिनु पर्छ सरले पनि त दाखिला गरिदिनु प¥यो,’ लेखापाल चौधरी गौतमलाई भनेका थिए ।
गौतमले आफूले भर्ना रकम पछि दिन्छु भनेर भर्ना गर्न आग्रह गरेको तर, भर्ना समय सकिँदासम्म पनि बैक दाखिला गर्नु पर्ने रकम नदिएपछि किर्ते रकम दिएको रसिद बनाएको देखिन्छ। ‘जुनसुकैको हाल्दिनुहोस् भन्नु भयो। मैले त्यसपछि कसैको नाम नहेरेर अन्दाजी रसिद नम्बर हाल्दिएको हुँ’ उनले बिल ठेली देखाउँदै भने ‘यहाँ विल ठेली छ। यही वर्षको हाल्नु पर्छ पुरानो हाल्न मिल्दैन।’
उनले आफ्नो नियत यस्तो नभको तर, गौतमको दबाबमा फर्जी काम गरेको स्वीकार गरे। आफू यसमा कुनै पनि जबाफदेही नहुने भन्दै उनले गौतमलाई सबै जिम्मेवार आफै हुनुहोला भनेका थिए। सुरुमा रकम नतिरेसम्म भर्ना नहुने बताएका लेखापाल चौधरीले पछि गौतमले रकम नबुझेरै अरूको भर्ना भएको रसिद नम्बर गौतमको हो भन्दै भर्ना रजिस्टरमा नाम चढाएका थिए।
यता सभापति गौतमले आफूले भर्ना गरिदिन भनेको तर, भर्ना भए नभएको जानकारी नलिएको बताएका छन्। उनले आफूले इन्ट्रान्स दिएको र डकुमेन्ट बुझाएको दाबी गरे। ‘यस विषयमा म अनविज्ञ छु। कसको बिल नम्बर हालियो, के हालियो’ उनले भने ‘मैले भर्ना गरिदिनुहोस् अहिले पैसाको सटेज छ। केही दिनमा तपाइहरूलाई उपलब्ध गराइदिन्छु भनेको थिए।’
स्ववियू निर्वाचन सकिएलगत्तै फर्जी विद्यार्थी मतदाता रहेको भन्दै जिल्ला अदालत कैलालीमा मुद्दा परेको थियो। उक्त विवादमा गौतम भने मुछिएका थिएनन्। तर, अहिले उनी पनि फर्जी भएको खुलेको हो।
अदालतमा मुद्दा परेपछि सभापति लगायत निर्वाचित पदाधिकारी तथा सदस्यहरूको शपथ भएको छैन। शपथ नहुँदै सभापति नै फर्जी भएको खुलेको छ। भर्ना नै नभएका व्यक्ति स्ववियू सभापति भएपछि अहिले क्याम्पसमा खैलाबैला मच्चिएको छ। यस विषयमा क्याम्पसले सर्वदलीय छलफल गर्न विद्यार्थी नेताहरूलाई बिहिवार बिहान बैठक बोलाएको छ।
