धनगढी, कैलाली । सुदूरपश्चिम प्रदेशमा पहिलोपटक मेरुदण्ड (स्पाइन) शल्यक्रिया सम्बन्धी विशेष गोष्ठी सम्पन्न भएको छ। नेपाल स्पाइन सर्जनहरूको संघको सहकार्यमा आयोजित सो गोष्ठी धनगढीस्थित रुबस होटलमा सम्पन्न भएको हो।
गोष्ठीमा ६२ जना चिकित्सक, स्वास्थ्यकर्मी तथा मेरुदण्ड विशेषज्ञहरूको उल्लेखनीय उपस्थिति रहेको स्पाइन सर्जन संघ सुदूरपश्चिमका प्रतिनिधि डा. ललित चौधरीले जानकारी दिए। उनका अनुसार यो कार्यक्रमले स्पाइन सम्बन्धी समस्याको पहिचान, शल्यक्रिया प्रविधिको जानकारी र जनचेतनाको अभिवृद्धिमा महत्वपूर्ण योगदान पुर्याउनेछ।
कार्यक्रममा नेपालका विभिन्न स्थानबाट आएका ख्यातिप्राप्त स्पाइन सर्जनहरू तथा विशेषज्ञहरूले कार्यपत्र प्रस्तुत गरेका थिए। आधुनिक प्रविधि, उपचार विधि र अनुभव आदानप्रदान गरिएको यो सम्मेलनले चिकित्सकीय दक्षता विकासमा समेत सहयोग पुर्याउने डा. चौधरीले बताए।
“सुदूरपश्चिम प्रदेशमा यस प्रकारको कार्यक्रम पहिलोपटक भएको हो। यसले प्रदेशभित्रका स्वास्थ्यकर्मीहरूलाई नयाँ प्रविधि र ज्ञानसँग साक्षात्कार गराउने मौका दिएको छ,” डा. चौधरीले भने। “हामी निकट भविष्यमा सुदूरपश्चिममै उन्नत स्पाइन उपचार सेवा विस्तार गर्न लागिपरेका छौं, र यो कार्यक्रम त्यसको प्रारम्भ हो,” उनले थपे।
गोष्ठीपछि प्रतिक्रिया दिँदै डा. चौधरीले सुदूरपश्चिम प्रदेशमा उच्चस्तरीय स्वास्थ्य सेवा प्रवाहका लागि यो कार्यक्रम एउटा नयाँ अध्यायको थालनी भएको उल्लेख गरे।
