बझाङ- जिल्लाको सदरमुकाम चैनपुरस्थित कारागारमा एचआईभी र क्षयरोग सम्बन्धी परीक्षण तथा परामर्श सेवा प्रदान गरिएको छ।
आज आयोजित एक विशेष स्वास्थ्य शिविरमार्फत ७२ जना कैदीबन्दीसहित ८१ जनाको स्वास्थ्य परीक्षण गरिएको हो। शिविरमा एक्सरे तथा अन्य परीक्षणमार्फत क्षयरोग र एचआईभीको जाँच गरिएको थियो।
शिविर अगुवा नारायण जोशीका अनुसार ७७ जनाको एचआईभी परीक्षण गर्दा सबैको रिपोर्ट नेगेटिभ आएको छ। यस्तै, ११ जनाको खकार सङ्कलन गरी थप परीक्षणका लागि पठाइएको छ।
स्वास्थ्य निर्देशनालय डोटीको आयोजनामा स्वास्थ्य कार्यालय बझाङका डाक्टर कमल सिंह नेतृत्वको टोलीले परीक्षण सञ्चालन गरेको थियो। शिविरमा नारायण जोशी र जनक सिंहको उपस्थिति रहेको थियो भने पत्रकार, सुरक्षाकर्मी र कारागार प्रशासनका सबैजना कार्यक्रममा सहभागी थिए।
