धनगढी— प्रदेश सरकारले स्थानीय तहका करार कर्मचारीलाई स्वतः स्थायी गर्ने विधेयक अघि बढाएपछि विद्यार्थीहरू आन्दोलित भएका छन्। उक्त विधेयकको विरोधमा संयुक्त विद्यार्थी संगठनले धनगढीस्थित प्रदेशसभा भवन अगाडि धर्ना दिएपछि स्थिति तनावग्रस्त बनेको हो।
विरोध प्रदर्शनलाई नियन्त्रणमा लिन खोज्दा विद्यार्थी र सुरक्षाकर्मीबीच धकेलाधकेल भएको प्रत्यक्षदर्शीहरू बताउँछन्। केही विद्यार्थीलाई प्रहरीले नियन्त्रणमा लिएको छ भने आन्दोलनरत विद्यार्थीहरूले उनीहरूको रिहाइको माग गरेका छन्।
विद्यार्थी संगठनहरूले उक्त विधेयकलाई लोकसेवाको मर्मविपरीत भन्दै तत्काल फिर्ता लिन माग गरेका छन्। उनीहरूले प्रदेश सरकारले आफ्नो माग बेवास्ता गरे आन्दोलन थप चर्काउने चेतावनीसमेत दिएका छन्।
