भारतको ओडिसास्थित कलिंगा इन्स्टिच्यूट अफ् इन्डस्ट्रियल टेक्नोलोजी (केआईआईटी) ले स्वर्गीय विद्यार्थी प्रकृति लम्सालको नाममा छात्रवृत्ति दिने घोषणा गरेको छ । केआईआईटीले आफ्नो होस्टलमा ज्यान गुमाएकी बुटवलकी लम्सालको नाममा नेपाली विद्यार्थीका लागि छात्रवृत्ति दिने निर्णय गरेको हो ।
केआईआईटीले सामाजिक सञ्जालमार्फत छात्रवृत्ति दिने घोषणा गर्दै यो कदमले प्रकृति जस्ता थुप्रै होनाहार विद्यार्थीहरुलाई कुनै बाधाविना शिक्षा अघि बढाउन सहयोग पुग्ने बताएको छ । युनिभर्सिटीका सञ्चालक प्रा. अच्युदानन्द सामन्तले नयाँ दिल्लीस्थित नेपाली दूतावासका कन्सुलर सञ्जीव शर्मा दास र नवीन अधिकारीसँग भेट गरेका थिए । त्यसक्रममा प्रकृतिलाई न्याय दिलाउने विषयमा छलफल भएको भनिएको छ ।
आइतबार अपराह्न २० वर्षीय प्रकृति होस्टलको कोठामा मृत अवस्थामा फेला परेकी थिइन् । उनले आफूमाथि सोही कलेजमा अध्ययरत एक विद्यार्थीले मानसिक यातना दिइरहेको भन्दै अन्तर्राष्ट्रिय सम्बन्ध विभाग (आईआरओ) मा दुई पटक निवेदन दिएकी थिइन् । तर, कलेजले गम्भीरता नदेखाउँदा उनले ज्यानै गुमाउनुपर्यो ।
आइतबार साँझबाटै नेपाली विद्यार्थीहरुले उनको न्यायको माग गर्दै प्रदर्शन थालेका थिए । तर, युनिभर्सिटी प्रशासनले प्रदर्शन गरेका विद्यार्थीहरुमाथि उल्टै आक्रमण गरेको र लखेटेको भिडियोहरु सामाजिक सञ्जालमा भाइरल भएपछि स्थिती नावग्रस्त बनेको थियो । कलेजमा भएको तनावपछि एक सयभन्दा बढी नेपाली विद्यार्थीहरु स्थलमार्ग हुँदै स्वदेश घर फर्किएका छन् ।
