धनगढी: कैलालीको धनगढी उपमहानगरपालिकाका मेयर गोपाल हमालको मिडिया ‘दिनेशखबर’ का सम्पादक वीरेन्द्र भट्टले जागिर छोडेका छन् । झण्डै पाँच वर्षदेखि सो मिडियामा कार्यरत उनले तलबबापत लाखौं रुपैयाँ लिन बाँकी छ ।
केही दिनअघि उनले सामाजिक सञ्जालमा जागिर छोडेको पोष्ट हालेका छन् । लेखेका छन्,‘मैले आजदेखि दिनेशखबर छोडेँ ।’ उनले तलबका लागि पत्रकारसम्बद्ध संघ संगठन गुहारेको बुझिएको छ । मेयर हमालको अनलाइनले विगतदेखि नै तलब दिन आनाकानी गर्दै आएको स्रोत बताउँछ ।
जसका कारण अधिकांश पत्रकारले तलब नलिइकन धमाधम जागिर छोडिरहेका छन् । सम्पादक भट्टले आफ्नो ६ लाख रुपैयाँ बाँकी रहेको बताए । गत माघ ६ गतेदेखि जागिर छोडेका उनले तलबका लागि निरन्तर मेयर हमालसँग आग्रह गरिरहेका छन् । उनले अलिअलि गरेर रकम लैजान भनेको भट्टको भनाइ छ ।
‘मैले मेयरसँग कुरा गरेँ । त्यसपछि म्यानेजमेण्टमा पनि कुरा राखेँ । उहाँहरु विभिन्न बहाना बनाउनुहुन्छ । अलिअलि पैसा लिएर जानु भन्नुहुन्छ । त्यसरी त त्यो पैसा उठाउन वर्षौं लाग्छ । मेरो पनि आफ्नो समस्या छन्’,उनले गुनासो पोखे । उनका अनुसार मेयर हमालले सँधै तलब दिन ढिलासुस्ती गर्दै आएका थिए । तर, पछिल्लो समय तलब नै दिन छोडिएको उनको भनाइ छ ।
तलबको समस्याले गर्दा धेरैले राजीनामा दिएको उनले जानकारी दिए । पहिले दुई दर्जन बढी कर्मचारी रहेकोमा अहिले तीन–चार जनाले मात्र काम गरिरहेका छन् । भन्छन्,‘यो अनलाइनमा पहिल्यैदेखि पैसाको समस्या रहेछ । मलाई थाहा भएन । मेयरले भन्नुभएपछि म आइहालेँ । पहिले केही समय राम्रै थियो । बीचमा अलि ढिलो हुन थाल्यो । पछि त तलब नै पाउन छोडियो ।’
भट्टका अनुसार उनले दुई महिनाअघि राजीनामा बुझाएका हुन् । तर, बल्लतल्ल राजीनामा स्वीकृत गरिएको बताउँछन् । उनले तलब नपाएको विषयमा पत्रकारसम्बद्ध संघसंगठनलाई मौखिक जानकारी गराएका छन् । आवश्यक परेमा लिखित उजुरी पनि दिने उनको जिकिर छ । सावार आजन आस्था
