धनगढी, पौष २० – सि.पि अस्पताल, धनगढी र कञ्चनपुरको बेलडाँडी गाउँपालिकाको संयुक्त आयोजनामा शनिबार एकदिने निःशुल्क स्वास्थ्य शिविर सफलता साथ सम्पन्न भएको छ।
बिहान १० बजेदेखि बेलडाँडी गाउँपालिकाको कार्यालय प्रांगणमा सञ्चालन भएको शिविरमा विभिन्न विशेषज्ञ चिकित्सकहरूको टोलीले स्वास्थ्य परीक्षण, उपचार, र परामर्श सेवा प्रदान गरेको थियो।
विशेषज्ञ टोलीमा वरिष्ठ सर्जन डा. सिपि पाण्डे, जनरल फिजिसियन डा. गौरव कुमार गुप्ता, र हाडजोर्नी विशेषज्ञ डा. अमित बहादुर सिंह लगायतले बिरामीहरूको स्वास्थ्य परीक्षण गरेका थिए।
शिविरमा रगत परीक्षण, भिडियो एक्सरे, फार्मेसी सेवा लगायतका निःशुल्क सेवा उपलब्ध गराइएको थियो। शिविरबाट करिब ६०० जनाले ओपीडी सेवा लिएका छन् भने ६० भन्दा बढी बिरामीले भिडियो एक्सरे सेवा प्राप्त गरेका छन्।
गरिब तथा विपन्न वर्गका लागि राहत
आर्थिक अभावका कारण उपचारबाट बञ्चित गरिब तथा विपन्न परिवारका बिरामीलाई लक्षित गरी आयोजित शिविरले रोग पहिचान र उपचार सेवा प्रदान गरेको छ।
सि.पि अस्पतालका प्रशासन प्रमुख हेम जोशीले सामाजिक उत्तरदायित्व अन्तर्गत शिविर सञ्चालन गरिएको बताए। “हामीले प्रत्येक वर्ष गरिब तथा विपन्न वर्गलाई लक्षित गरी यस्ता कार्यक्रम आयोजना गर्दै आएका छौँ,” उनले भने।
स्वास्थ्य सेवाको पहुँच दुर्गम क्षेत्रसम्म
बेलडाँडी जस्तो दुर्गम क्षेत्रमा स्वास्थ्य सेवा पुर्याउन शिविरले महत्त्वपूर्ण भूमिका खेलेको गाउँपालिका अध्यक्ष हरिश चन्द्र रानाले बताए। “यस शिविरले स्वास्थ्य सेवाबाट बञ्चित समुदायलाई ठूलो राहत पुर्याएको छ,” उनले भने।
शिविरमा सहभागी सबै बिरामीलाई निःशुल्क औषधि वितरण गरिएको अस्पतालका फार्मेसी इन्चार्ज बिनेश कठरियाले जानकारी दिए।
यो शिविरले दुर्गम क्षेत्रका नागरिकलाई आधारभूत स्वास्थ्य सेवामा पहुँच पुर्याउन सघाउ पुर्याउँदै सामाजिक उत्तरदायित्वलाई थप प्रभावकारी बनाएको देखिन्छ।
