बझाङ, असार १७ : केही दिनदेखि लगातार पानी पर्न थाले सँगै बझाङका अधिकांश ग्रामीण सडकहरु अवरुद्ध भएका छन् ।
वर्षाले जिल्लाका सबैजसो ग्रामीण सडकहरुमा पहिरो खस्दा यातायात आवागमनमा कठिनाइ भएको जीप व्यवसायीको भनाइ छ ।
ग्रामीण सडकमा पहिरो आउँदा उक्त सडकमा चल्ने सार्वजनिक यातायातका यात्रुले कष्टकर यात्रा गर्न बाध्य भएका छन् । पानी परेसँगै तमैलबाट खप्तडछान्नासम्म जाने कच्ची मार्गमा समेत पहिरो खस्न थालेपछि यातायात सञ्चालनमा कठिनाइ भएको स्थानीय सुस्मिता खातिले बताइन् ।
त्यस्तै जिल्लाको मुख्य सडक जयपृथ्वी राजमार्गका विभिन्न ठाउँहरुमा पनि वर्षाले पहिरो आउँदा यातायातका साधन चलाउन समस्या भएको छ । आइतबार मात्रै जयपृथ्वी राजमार्ग अन्तर्गत छविसपाथिभेरा – १ को जालेबगरमा पहिरो खसेर सडक अवरुद्ध भएको थियोे ।
त्यसैगरी, जिल्ला सदरमुकाम देखि जिल्लाका विभिन्न गाउँबस्ती जोड्ने सडकमा पनि पहिरो आउँदा उक्त सडकमा यातयातका साधन चल्न बन्द भएको जिल्ला ट्राफिक प्रहरी कार्यालय बझाङले जनाएको छ ।
अधिकांश ग्रामीण सडकमा पानी निकास हुने नालासमेत नहुँदा सडकबाटै भल बग्ने गरेका कारण पनि सडक भासिने र भत्किने बढी सम्भावना भएको जीप चालक पदम विष्टले बताए ।
साघुँरा एवं हचुवाका भरमा काटिएका यहाँका ग्रामीण सडकमा यातयातका साधन चलाउन निकै समस्या हुँदै आएको जीप चालकहरु बताउँछन् । वर्षा लागेपछि बर्सेनि यहाँका ग्रामीण क्षेत्रका अधिकांश सडकमा सवारी साधन सञ्चालन गर्न कठिनाइ हुने भए पनि त्यसको समस्या समाधानका लागि कसैले पनि ठोस कदम नचालेको स्थानीयको गुनासो छ
