सर्जक, लवदेव धामी (लव)
झ्याउरे लयमा : देश, आमा र छोरा
हे मेरी आमा के पायौ छोरा बनाउन विदेशी।
को जान्थ्यो विदेश मेरो यो देशमै भविष्य भएसी।।
न पैसा मेरो न भयो शक्ति पाउन रोजगारी।
विदा देउ भन्छ यो तिम्रो छोरो ति आँशु नझारी।।
पुगेछु भने के गरी खाडी फेर्नेछु त्यो चोलो।
एक दिन आउँछ संसार सबै भन्छनि छ गोलो।।
कोहीले बेच्ने कोहीले किन्ने नेपाल आमालाई।
अकालमै मरे बचाउन खातिर ति मेरा दाजुभाइ।।
मारेकै थिए हटाउन राजा हे आमा वीर छोरा।
ल्याएर पनि यो गणतन्त्र भाषण त छन् कोरा।।
सत्तामा पुग्न मर्ने र मार्ने आमाको काख खाली।
के चाहियो अब भन ए बाबु गणतन्त्रलाई फाली।।
चल्दैन बन्दुक देशैका रक्षक मार्दा त कसैले,
गोली नै खाए यी मेरा छोरा बोल्दा त अहिले।।
न राम्रो शासन न छोरा रह्यो न मलाई जोगायौँ ।
भन ए दलाल भ्रष्टाचारी को बाट के पायौ ।।
हुँदैन शान्ति नगए सम्म बुद्धको बाटोमा।
के अत्याचार गर्दैछौं अहिले यो मेरो माटोमा।।
