बाजुरा: बुढीगंगा नगरपालिकामा एक महिनादेखि सञ्चालनमा रहेको माटोका भाँडाकुँडा बनाउने सीपमूलक तालिम हिजो एक कार्यक्रमका बीच समापन गरिएको छ । बुढिगंगा नगरपालिका सीप विकास तथा प्रशिक्षण केन्द्र र GIZ-RIP Green परियोजनाको आर्थिक तथा प्राविधिक सहयोगमा सम्पन्न उक्त तालिमले स्थानीय युवाहरूलाई आत्मनिर्भर र व्यवसायमुखी बनाउने लक्ष्य लिएको हो ।
समापन समारोहमा नगर प्रमुख राम बहादुर बानियाँले सहभागीहरूलाई प्रमाणपत्र वितरण गर्दै भने, “यो तालिमले कम्तीमा केही युवाहरूमा स्वरोजगारप्रतिको प्रेरणा जगाउनेछ भन्नेमा म ढुक्क छु। अब हामी नगरले पनि आवश्यक सहयोग पुर्याउनेछौं ताकि यी सीपहरू केवल अभ्यासमा मात्रै सीमित नहून्, व्यवसायको रूपमा विकास होउन्।”
कार्यक्रममा नगर उपप्रमुख माया खड्का (कुवर) ले सहभागी युवती र महिलाहरूको सक्रियता उल्लेख गर्दै भनिन्, “महिलाहरूको सहभागिता निकै उत्साहजनक देखियो। महिलाहरू पनि अब सशक्त र स्वरोजगारमुखी बन्ने चरणमा आइपुगेका छन्। यस्ता तालिमहरू अझै विस्तार गर्न नगरपालिका प्रतिबद्ध छ।”
तालिममा नगरका विभिन्न वडाबाट १५ जना बढि युवायुवतीको सहभागिता रहेको थियो । उनीहरूले परम्परागत माटोका भाँडाकुँडा निर्माणको प्रविधिबाट सुरु गरेर आधुनिक डिजाइन र टिकाउपनासमेत जोड्ने सीप सिकेका थिए । तालिम अवधिभर व्यावहारिक अभ्यास, कच्चा पदार्थको छनोट, मोल्डिङ, सुकाउने प्रक्रिया, पकाउने प्रविधि लगायत सम्पूर्ण चरणहरूको प्रयोगात्मक अभ्यास गरिएको थियो ।
स्थानीय समुदायका अगुवा, नगरका वडाध्यक्षहरू तथा प्रशिक्षकहरूको समेत उपस्थिति रहेको समापन कार्यक्रममा सहभागीहरूले तालिमपछि आफू व्यवसाय सुरु गर्ने प्रतिबद्धता व्यक्त गरेका छन् । नगरपालिकाले पनि भविष्यमा तालिम पश्चातको अनुगमन, उपकरणको उपलब्धता र बजार विस्तारको पक्षमा काम गर्ने बताएको छ ।
यस तालिमले बुढीगंगाका युवाहरूमा परम्परागत सीपको संरक्षण मात्र नभई आर्थिक सशक्तीकरणतर्फको बाटो समेत देखाएको स्थानीयको धारणा छ ।
