बझाङ: २०८२ साल बैसाख २४ गते बझाङको जिल्ला प्रशासन कार्यालयको आयोजनामा मदिरा नियन्त्रणसम्बन्धी एक महत्वपूर्ण बैठक सम्पन्न भयो । सो बैठकमा जनप्रतिनिधि, सरकारी कर्मचारी, सरोकारवाला निकायका प्रतिनिधि, नागरिक अगुवा, राजनीतिज्ञ तथा स्थानीय समुदायको बाक्लो उपस्थिति रहेको थियो । बैठकको मुख्य उद्देश्य बझाङ जिल्लामा मदिरा सेवन र यसको दुर्व्यसनबाट उत्पन्न हुने सामाजिक समस्या समाधान गर्न आवश्यक रणनीति तयार गर्नु थियो ।
उक्त कार्यक्रममा बुंगल नगरपालिकाका मेयर जयबहादुर धामीको अभिव्यक्ति भने अहिले विवादको भुमरीमा परेको छ । मेयर धामीले आफ्नो मन्तव्य राख्ने क्रममा ‘मेरा बुंगलबासि श्रीमतीको पेटिकोट सम्म बेचेर रक्सी खान्छन्’ भनी दिएको टिप्पणीले स्थानीय समुदायमा आक्रोश सिर्जना गरेको छ । बझाङको स्थानीय संस्कृति र परम्परामा ‘पेटिकोट’ शब्दलाई अश्लील तथा अपमानजनक मानिने भएकाले, एक जिम्मेवार जनप्रतिनिधिबाट यस्तो अभिव्यक्ति आउनु दुःखद भएको स्थानीयको भनाइ छ ।
मेयर धामीको उक्त अभिव्यक्ति सार्वजनिक भए लगत्तै सामाजिक सञ्जालमा यसको चर्को विरोध भइरहेको छ । कामना टेलिभिजनले उक्त अभिव्यक्ति सहितको भिडियो प्रसारण गरेपछि जनमानसमा आक्रोश अझै बढेको छ । विशेषगरी महिला अधिकारकर्मीहरूले यसलाई महिलामाथि अपमानजनक तथा गैरजिम्मेवारपूर्ण भनाइको रूपमा लिएका छन् ।
यसअघि पनि मेयर धामी विभिन्न विवादमा तानिँदै आएका थिए । कहिले ‘कर्मचारी बनाईदिन्छु’ भन्दै घुस लिएको अडियो त कहिले स्थानीयलाई गाडीले ठक्कर दिएको घटना र चरेस काण्ड मिलाइदिने बार्गेनिङ गरेको प्रमाण कामना टेलिभिजनले प्रशारण गरिसकेको छ । यी सबै घटनाले धामीको छवि जनप्रतिनिधि भन्दा बढी विवादास्पद पात्रको रूपमा उभ्याएको छ ।
धामीको पछिल्लो अभिव्यक्तिपछि बुंगल नगरपालिका र बझाङ जिल्लाभरि चर्को विरोधको लहर चलेको छ । नागरिक समाज, महिला अधिकारकर्मी, राजनीतिक दल तथा स्थानीय अगुवाहरूले धामीको अभिव्यक्तिको कडा आलोचना गर्दै सार्वजनिक रूपमा माफी माग्नुपर्ने माग गरेका छन् ।
सरोकारवालाहरूले यस्तो गैरजिम्मेवार अभिव्यक्ति जनप्रतिनिधिले दिनु नै अनुचित भएको बताउँदै आएका छन्। नागरिक अगुवाहरूले यसले स्थानीय समाजमा गलत सन्देश दिएको भन्दै धामीलाई जिम्मेवार बनाउने खालको कानूनी प्रक्रिया अघि बढाउनुपर्ने बताएका छन् ।
यस विषयमा मेयर धामीको आधिकारिक प्रतिक्रिया भने आउन बाँकी छ । त्यस्तै, मेयर धामीले कार्यपालिकामा गरेका चलाखीपूर्ण बदमासी, कम्प्युटर खरिदमा कमिसन नमिलेपछि दुई वर्षदेखि रोकिएको भुक्तानी तथा अन्य विषयहरूको बारेमा यतिबेला कामना टेलिभिजनको डेस्कमा जानकारीहरू उपलब्ध भईरहेका छन् । सम्पूर्ण प्रमाणीकरण पछि कामनाले यो विषयमा थप अनुसन्धानसहित फ्लोअप गर्नेछ ।
“मेयर धामिको विवादास्पद भिडियोको क्लिप”
