सुनसरी- देवानगञ्ज गाउँपालिकामा भएको गोली प्रहार घटनामा संलग्न तीन जना पक्राउ परेका छन्। पक्राउ पर्नेमा देवानगञ्ज–७ का २१ वर्षीय शिवकुमार मेहता, देवानगञ्ज–१ का रवीनकुमार यादव र पिन्टु यादव रहेका छन्।
सुनसरीका प्रहरी उपरीक्षक सुमनकुमार तिम्सिनाका अनुसार गोली लागेर गम्भीर घाइते भएका मेहताको विराटनगरमा प्रहरी निगरानीमा उपचार भइरहेको छ।
घटनामा संलग्न अर्का समूहका तीन जना अझै फरार छन्। फरारमध्ये कामेश्वर यादवसहितका तीन जना सीमावर्ती क्षेत्रमा बस्दै आपराधिक गतिविधिमा संलग्न रहेको प्रहरीको भनाइ छ।
प्रहरीका अनुसार घटनामा कुल ६ जनाको संलग्नता रहेको छ। प्रारम्भिक अनुसन्धानमा उनीहरू सबै आपराधिक पृष्ठभूमिका रहेको र भारतमा समेत खोजीको सूचीमा परेका तथ्य खुलेका छन्।
पक्राउ परेका रवीन यादव यसअघि गाँजा तस्करीमा संलग्न रहेको र केही दिनअघि मात्र पक्राउ परेर छुटेका थिए।
प्रहरीका अनुसार घाइते मेहताको अवस्था गम्भीर छ। रासस
