हरेक देशको परिवर्तनको आधार एउटा आन्दोलन र एउटा कुशल नेतृत्व हो, जसले देशलाई नयाँ दिशामा अघि बढाउँछ। नेपालको इतिहासदेखि वर्तमानसम्मका हरेक कालखण्डमा कुनै व्यक्ति, कुनै नीति, कुनै विचार, कुनै पार्टी वा कुनै सिद्धान्तले देशलाई परिवर्तनको जग निर्माण गरेको छ। ती परिवर्तनका संवाहकहरूलाई सम्मान गर्नु हरेक नेपाली नागरिकको कर्तव्य हो।
इतिहासका पानाहरू पल्टाउँदै गर्दा, अंग्रेजविरुद्धको लडाइँ, राणाविरुद्धको लडाइँ र पञ्चायती शासनविरुद्धको संघर्षमा नेतृत्वदायी भूमिका खेल्ने वीर नेपालीप्रति हामीले उच्च सम्मान व्यक्त गर्नुपर्छ। आज हामी २१औं शताब्दीमा उभिएका छौं, जहाँ आम नागरिकका हक, अधिकार र हित सुनिश्चित भएका छन्।
आजको नेपालको यो परिकल्पना र उपलब्धिहरूको जग जनयुद्धले निर्माण गरेको हो। जनयुद्धका नेतृत्वकर्ता प्रचण्ड, बाबुराम र वैद्यजस्ता अग्रजहरूले गणतन्त्रको स्वामित्व स्थापित गर्न ऐतिहासिक भूमिका खेलेका छन्। जनयुद्धले दिएको अधिकार इतिहासका पानाबाट मेटिन सक्दैन।
यो संघर्ष गरिब, दलित, उत्पीडित र पिछडिएका वर्गहरूको लागि अत्यन्त महत्त्वपूर्ण रह्यो। सामान्तवादी राज्यसत्तामा रमाउने र जनताको अधिकारलाई थिच्न खोज्ने शक्तिहरूका लागि जनयुद्ध टाउको दुखाइ बनेको छ। तर गरिब, उत्पीडित र दलित वर्गको लागि यो आन्दोलन महान थियो, महान छ र महान रहिरहनेछ।
आज पनि दलाल र विदेशी पुँजीवादी शक्तिहरूलाई जनताले प्राप्त गरेका अधिकार पचाउन गाह्रो भइरहेको छ। किनकि उनीहरूको सोच र नियत सधैं स्वार्थ केन्द्रित रहेको छ। तिनीहरूले आफूभन्दा बलियो अरूलाई स्वीकार्न चाहँदैनन्।
त्यसैले, फागुन १ गते मनाइने जनयुद्ध दिवस सम्पूर्ण गरिब, पिछडिएका, दलित, महिला र उत्पीडित वर्गहरूको पर्व हो। यसलाई उत्साहका साथ मनाऔं र जनयुद्ध तथा माओवादीले देशका लागि खेलेको भूमिकालाई सम्मान गरौं।
प्रकाश नेपाली
(प्रदेश सह-सचिव, नेकपा माओवादी केन्द्र)
