बझाङ: बझाङका प्रतिनिधिसभा सदस्य ऐनबहादुर महरले जिल्लाका रणनीतिक सडक आयोजनाहरू आगामी आर्थिक वर्षको बजेटसहित योजनामा समावेश गर्न माग गरेका छन् । उनले सडक विभागलाई पत्र लेख्दै बझाङमा सडक पूर्वाधार विकास अझै सुस्त रहेको उल्लेख गरेका हुन् ।
महरका अनुसार २०४१/४२ सालदेखि निर्माण सुरु भएको खोड्पे–बझाङ (जयपृथ्वी राजमार्ग) अझै प्रभावकारी रूपमा सञ्चालनमा आउन सकेको छैन । अन्य महत्वपूर्ण सडक आयोजनाहरू पनि ढिलाइमा रहेको उनले बताएका छन् ।
उनले बैतडीको अनारखोलास्थित सडक आयोजना कार्यालय बझाङमै सार्नुपर्ने माग गर्दै स्थानीय स्तरबाटै आयोजना सञ्चालन भए काम छिटो र प्रभावकारी हुने विश्वास व्यक्त गरे, आगामी बजेटमा खोड्पे–बझाङ सडक स्तरोन्नति तथा कालोपत्रे, खुटिया–दिपायल–चैनपुर सडकअन्तर्गत बझाङ–झनाना–दिपायल खण्ड सुधार, बित्थड–बुङ्गल–छविस हुँदै जयपृथ्वी नगरपालिका जोड्ने सडक,वागथला–बुङ्गल–गन्नैलेक हुँदै दार्चुला जोड्ने सडक, सेती लोकमार्गअन्तर्गत जडार–थामलेक खण्ड कालोपत्रे तथा चैनपुर–ताक्लाकोट सडक निर्माणलाई प्राथमिकतामा राख्न उनले सिफारिस गरेका छन्।
यसैबीच, सडक विभागमा भएको छलफलपछि चैनपुर–ताक्लाकोट सडकको निर्माण आगामी असार १५ भित्र सम्पन्न गर्ने सहमति भएको छ। तोकिएको समयमा काम नसके ठेक्का रद्द गरी निर्माण कम्पनीलाई कारबाही गर्ने चेतावनीसमेत दिइएको छ । स्थानीयवासीले वर्षौंदेखि अधुरा सडक आयोजना शीघ्र सम्पन्न गर्न सरकारसँग माग गर्दै आएका छन् ।
