ओली पक्राउको विरोधमा एमालेद्वारा देशभर विरोधपत्र बुझाइँदै

पार्टी अध्यक्ष एवं पूर्व प्रधानमन्त्री केपी शर्मा ओली पक्राउको विरोधमा नेपाल कम्युनिष्ट पार्टी (एमाले) ले आज देशभरका जिल्ला प्रशासन कार्यालयमा विरोधपत्र बुझाउने भएको छ।
शनिबार बसेको आकस्मिक सचिवालय बैठकको निर्णयअनुसार पार्टीले आज देशव्यापी रूपमा विरोधपत्र बुझाउने कार्यक्रम तय गरेको हो।
एमालेले भदौ २३ र २४ मा भएका घटनाको छानबिन गर्न गठन गरिएको गौरीबहादुर कार्की आयोगप्रति असहमति जनाउँदै उक्त घटनाको निष्पक्ष छानबिनका लागि उच्चस्तरीय आयोग गठन गर्न माग गरेको छ।
यस्तै, ओली पक्राउपछिको अवस्थाबारे संसदमा रहेका विभिन्न दलहरूसँग संवाद गरी सामूहिक प्रतिवाद कार्यक्रम सञ्चालन गर्न पार्टीले नेताहरू विष्णु पौडेल, रामबहादुर थापा र गोकर्ण विष्ट लगायतलाई जिम्मेवारी तोकेको जनाएको छ।