अछाम- नेकपा एमालेका तर्फबाट अछाम क्षेत्र नं- १ का प्रतिनिधि सभा सदस्य उम्मेदवार दिपक साउँदले बिरामीसँग भेटघाट गर्दै शीघ्र स्वास्थ्य लाभको कामना गर्नुभएको छ।
चुनावी अभियानका क्रममा व्यस्त रहेका साउँद शुक्रबार बयालपाटा प्रादेशिक अस्पताल पुगेर उपचाररत बिरामीहरूलाई भेट्नुभएको हो।
उहाँले अस्पतालका विभिन्न वार्डमा पुगेर बिरामीहरूको स्वास्थ्य अवस्थाबारे जानकारी लिनुका साथै उनीहरूले उपचारका क्रममा भोग्नु परेका समस्या र सेवासम्बन्धी गुनासाहरू पनि सुन्नुभएको थियो।
भेटघाटका क्रममा साउँदले बिरामीहरूको मनोबल उच्च राख्न आग्रह गर्दै छिटो स्वास्थ्य सुधारको कामना गर्नुभयो।
उहाँले स्वास्थ्य सेवा नागरिकको आधारभूत अधिकार भएकाले ग्रामीण भेगका नागरिकले सहज, सुलभ र गुणस्तरीय स्वास्थ्य सेवा पाउनुपर्नेमा जोड दिनुभयो।
अस्पतालमा उपचाररत सबै बिरामीलाई व्यक्तिगत रूपमा भेट्दै साउँदले उपचार सेवामा देखिएका कमी–कमजोरी सुधारका लागि आफू प्रतिबद्ध रहेको बताउनुभयो।
साथै आगामी दिनमा स्वास्थ्य क्षेत्रको पूर्वाधार विकास, आवश्यक जनशक्ति व्यवस्थापन तथा औषधि आपूर्तिमा सुधार ल्याउन पहल गर्ने प्रतिबद्धता व्यक्त गर्नुभयो।स्थानीय नागरिक तथा बिरामीका आफन्तहरूले उम्मेदवार स्वयं अस्पताल पुगेर स्वास्थ्य अवस्थाबारे चासो देखाएकोमा सकारात्मक प्रतिक्रिया दिएका थिए। चुनावी घरदैलो तथा भेटघाट कार्यक्रमबीच पनि बिरामीको अवस्थाबारे बुझ्न अस्पताल पुग्नुले साउँदको सामाजिक उत्तरदायित्वप्रति प्रतिबद्धता झल्काएको सहभागीहरूको भनाइ रहेको छ।
साउँदसँग अस्पताल एमाले केन्द्रीय सदस्य जिल्ला इन्चार्ज झपड बोहरा, एमाले सुदूरपश्चिम अध्यक्ष कृष्णप्रसाद जैसी लगायतका नेताकार्यकर्ताको सहभागिता रहेको थियोे ।
